上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
君王及節期
46:1 至高的上主按呢講：「內埕的東門，安歇日及初一著拍開，會當做工彼六日著關啲。
46:2 祭司欲為王獻燒化祭及平安祭的時，王著對外埕經過此個門的走廊入來，徛佇門柱邊，佇戶橂遐敬拜；敬拜了後就退出去。此個門著一直開啲，下昏以前毋通關。
46:3 每一個安歇日及初一，全國的人民著佇此個門的頭前敬拜上主。
46:4 安歇日，王著用六隻無瑕疵的羊羔，及一隻無瑕疵的綿羊，做燒化祭獻互上主。
46:5 像時著獻的素祭，每一隻綿羊配十七公升半的幼麵粉，每一隻羊羔配偌多幼麵粉，王通照家己的能力決定。每十七公升半的幼麵粉著合三公升的油。
46:6 每月初一，伊著獻無瑕疵的細隻牛一隻、羊羔六隻、綿羊一隻。
46:7 王嘛著準備素祭，每一隻牛及每一隻綿羊，攏著配十七公升半的幼麵粉做夥獻；每一隻羊羔配偌多幼麵粉，王通照家己的能力決定。每十七公升半的幼麵粉著及三公升的油做夥獻。
46:8 王對外埕此個門的走廊入來，嘛著對原路出去。
46:9 「佇節期，人民欲來敬拜上主的時，對北門入來的，著對南門出去；對南門入來的，著對北門出去。不准𪜶對仝一個門出入；𪜶著對入來的門對面彼個門出去。
46:10 王著佇人民入來的時入來，佇人民出去的時出去。
46:11 佇節期及指定的日子，欲獻的素祭，每一隻牛，抑是綿羊，著配十七公升半的幼麵粉。每一隻羊羔著配偌多幼麵粉，王通照家己的能力決定。每十七公升半的幼麵粉著及三公升的油做夥獻。
46:12 「王照伊的心意奉獻燒化祭抑是平安祭互上主的時，著為伊開東門。伊著照安歇日的條例獻燒化祭及平安祭。伊離開了後，門著關起來。」
逐日著獻的祭
46:13 「王逐日著準備一隻無瑕疵一歲的羊羔，做燒化祭逐早起獻互上主。
46:14 逐早起王嘛著獻素祭，用一公升油抄兩公升幼麵粉獻互上主。此個素祭的規例著永遠遵守。
46:15 逐早起著按呢，用羊羔、素祭，及油做燒化祭獻互上主。」
王及土地
46:16 至高的上主按呢講：「王若將家己的土地賜互伊任何一個子，彼塊地就歸屬彼個子；彼個子通給土地留互伊的子孫做產業。
46:17 王若將伊的土地賜互伊的人臣，彼塊地就歸屬彼個人臣；毋拘到『恩惠的年』，人臣著將彼塊地還互王，因為只有王的子孫才會當承接彼塊地。
46:18 王𣍐用得侵佔人民的土地，給𪜶趕離開𪜶的土地。伊著將家己的土地分互伊的子兒，才免我的子民離開𪜶的土地，四散去逐所在。」
聖殿的灶腳
46:19 後來，彼個人導我對大門邊仔的入口，入去許個向北，為著祭司準備的聖的房間。我看見上西旁的所在有一塊空地。
46:20 伊給我講：「這是互祭司煮賠罪祭及贖罪祭的肉，以及烘素祭的祭物的所在，才免祭司給聖的祭物帶去外埕，互人民因為接觸著聖的物致到受責罰。」
46:21 伊閣導我去外埕，經過外埕四個角頭；每一個角頭攏有一個細細的埕。
46:22 諸個細細的埕攏有牆仔圍啲，長二十公尺，闊十五公尺；四個角頭細細的埕大細攏仝款。
46:23 每一個細的埕四邊攏有石牆，石牆下面有灶。
46:24 彼個人給我講：「遮是灶腳，聖殿的工作人員佇遮煮人民獻的祭物。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。