上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
以西結受帶到耶路撒冷
40:1 阮受放逐的第二十五年，就是耶路撒冷淪陷的第十四年，正月初十，上主的氣力充滿我，給我導去以色列地。
40:2 佇異象中，上主給我下佇以色列地一座極高的山。山的南旁若親像有一座城。
40:3 伊導我去遐；我看見一個人，伊的形狀親像銅發光，手提麻索及蘆竹的量尺，徛佇門口。
40:4 伊對我講：「人子啊，我給你吩咐的，你著詳細看，注意聽，閣記佇心內，因為這是我導你來遮的目的。你著將所看見的一切，攏給以色列人講。」
東門
40:5 我看見聖殿，四周圍有圍牆。彼個人手提一支三公尺長的蘆竹尺。伊量牆；牆高三公尺，厚三公尺。
40:6 伊到東門，𬦰上崎仔，量門的戶橂，闊三公尺。
40:7 遐嘛有守衛室；逐間長三公尺，闊三公尺。房間及房間中間閬兩公尺半。走廊有一個門向聖殿；彼個門的戶橂，闊三公尺。
40:8 伊量欲去聖殿的門的走廊，闊三公尺。
40:9 伊閣量迵去聖殿彼個走廊，闊四公尺；壁柱厚一公尺。
40:10 東門的守衛室此旁三間，彼旁三間，逐間大細攏像款；兩旁的壁柱厚度嘛像款。
40:11 伊量東門的入口闊五公尺，門本身六公尺半。
40:12 逐間守衛室的頭前攏有牆仔，高五十公分，厚五十公分；房間的長及闊攏三公尺。
40:13 兩旁守衛室的門相對，此旁守衛室的外壁量到彼旁守衛室的外壁，有十二公尺半。
40:14 伊順牆量，到迵去外埕的牆，長三十公尺。
40:15 伊閣對大門口此旁量到走廊後面的牆，長二十五公尺。
40:16 逐間守衛室、壁柱及壁柱的中間，以及走廊兩旁攏有窗仔。壁柱頂面有刻棕樹。
外埕
40:17 彼個人導我去外埕。外埕周圍有三十間房間，土腳鋪石。
40:18 鋪石的路對內埕踅到外埕，闊度及門仝款；外埕鋪的路比內埕較低。
40:19 伊閣量對內埕的門到外埕外壁的門，長五十公尺。北旁及東旁像款。
北門
40:20 彼個人閣量外埕北門的長及闊。
40:21 走廊兩旁各有三間守衛室。兩旁的壁柱以及走廊的寸尺及東門像款，長二十五公尺，闊十二公尺半。
40:22 走廊、窗仔，及雕刻的棕樹，攏及東門的寸尺仝款。走廊的入口𬦰七層崎仔上到北門；走廊另外一旁迵外埕。
40:23 內埕有一個門及北門相對；北旁及東旁攏像款。伊量此兩個門的距離，長五十公尺。
南門
40:24 彼個人導我行對南旁，去到南門。伊量此個門；兩旁的壁柱以及走廊的寸尺攏及頭前兩個門仝款。
40:25 此個門兩旁及走廊四周圍攏有窗仔，及頭前量的窗仔仝款。門的走廊長二十五公尺，闊十二公尺半。
40:26 走廊的入口𬦰七層崎仔上到南門，走廊另外一旁迵外埕。走廊的壁柱有刻棕樹，此旁一欉，彼旁一欉。
40:27 內埕南旁嘛有門。彼個人量此兩個門中間的距離，長五十公尺。
內埕的南門
40:28 彼個人導我對南門入去內埕。伊量內埕的南門，寸尺及外埕的門像款。
40:29 諸個守衛室、走廊，及壁柱，大細攏及其他的門仝款。此個門及走廊四周圍攏有窗仔。門的走廊長二十五公尺，闊十二公尺半。
40:30 四面有走廊，長二十五公尺，闊十二公尺半。
40:31 走廊面向外埕，壁柱有刻棕樹；𬦰八層崎仔就迵到此個門。
內埕的東門
40:32 彼個人導我對東門入去內埕。伊量內埕的東門，寸尺及外埕的門像款。
40:33 諸個守衛室、走廊，及壁柱，大細攏及其他的門仝款。此個門及走廊四周圍攏有窗仔。門的走廊長二十五公尺，闊十二公尺半。
40:34 走廊面向外埕，門兩旁的壁柱攏有刻棕樹；𬦰八層崎仔就迵到此個門。
內埕的北門
40:35 彼個人導我對北門入去內埕。伊量內埕的北門，寸尺及外埕的門像款。
40:36 伊嘛量諸個守衛室、走廊，及壁柱。門的四周圍攏有窗仔。門的走廊長二十五公尺，闊十二公尺半。
40:37 走廊面向外埕，走廊兩旁的壁柱攏有刻棕樹；𬦰八層崎仔就迵到此個門。
廂房
40:38 佇逐個門的走廊邊仔攏有一間有門的房間；祭司佇遐洗燒化祭的牲生。
40:39 走廊有下桌仔，此旁兩塊，彼旁兩塊；𪜶佇諸個桌仔頂刣燒化祭、贖罪祭，及賠罪祭的牲生。
40:40 走廊欲去北門的門口，向外面彼旁有兩塊桌仔，向內面此旁嘛有兩塊。
40:41 所以，大門兩旁各有四塊桌仔，總共有八塊，通佇彼頂面刣獻祭的牲生。
40:42 燒化祭欲用的桌仔有四塊；諸個桌仔是用石頭拍的，高五十公分，桌面長闊攏是七十五公分；刣燒化祭及其他祭祀的牲生欲用的器具下佇桌頂。
40:43 走廊四周圍的壁有鉤仔，長七公分半。獻祭的肉攏下佇桌頂。
40:44 彼個人導我入去內埕。內埕有兩間為著唱歌的人設的房間，一間佇北門的邊仔，向南；一間佇南門的邊仔，向北。
40:45 伊給我講：「向南的房間是欲互佇聖殿侍奉的祭司用的。
40:46 向北的房間是欲互佇祭壇侍奉的祭司用的。諸個祭司攏是利未支族中撒督的後代；只有𪜶通來上主面前侍奉。」
內埕及聖殿
40:47 彼個人閣量內埕，長、闊攏是五十公尺。祭壇佇聖殿頭前。
40:48 伊閣導我去到聖殿頭前的走廊。伊量走廊的壁柱，厚兩公尺半；門的闊七公尺，兩旁的壁厚攏是一公尺半。
40:49 走廊的長十公尺，闊五公尺半；人著𬦰崎仔才會當去到走廊。倚近壁柱有柱仔，此旁一支，彼旁一支。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。