上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
賠償的條例
22:1 上主對摩西講：「人若偷牽牛抑是羊，無論是掠去刣抑是牽去賣，一隻牛著賠五隻，一隻羊著賠四隻。
22:2 賊一定著賠償；若無通賠，伊著賣身來賠伊偷的物件。伊所偷的牛、驢，抑是羊，若猶活啲，伊就著賠重倍。賊若佇暝時挖孔偷提，互人抵著，閣互人拍死，拍死人的無算有罪。若日頭已經出，拍死人的就有罪。
22:3 併於上節
22:4 併於上節
22:5 「人放牲生佇家己的園抑是葡萄園食草，若出在𪜶食別人園裡的物，著用家己園裡抑是葡萄園上好的出產賠償。
22:6 「人若起火燒莿，湠到割了的麥堆，抑是猶未割的麥仔，抑是田園，起火的人一定著賠償。
22:7 「人將銀抑是物件寄厝邊保管，諸個物件佇保管的人𪜶兜若著賊偷，賊仔若有掠著，賊仔著賠重倍；
22:8 賊仔若無掠著，彼個互人寄的人著去審判官遐，證明伊無提厝邊的物件。
22:9 「關係侵佔牛、驢、羊、衣服，抑是拍毋見物件的訴訟，若有人講『這是我的』，煞引起紛爭，雙方著去審判官遐；審判官若裁決什麼人有罪，彼個人著重倍賠伊的厝邊。
22:10 「人若將牛、羊、驢，抑是別款牲生寄厝邊照顧，牲生若死去，抑是受傷，抑是互人搶去，毋拘無人看著，
22:11 兩個人著到上主面前咒誓；受託的人表明伊無動著厝邊的牲生，原主就著接受，受託的人毋免賠。
22:12 若確實知牲生是互人偷牽去，受託的人著賠原主。
22:13 若是互野獸拆碎，受託的人著帶彼個屍體來做證據，伊就毋免賠。
22:14 「人給厝邊借牲生去使用，牲生若有受傷抑是死去，原主無在場，借的人一定著賠。
22:15 原主若有在場，借的人就毋免賠；若是租的，損失對租金抵。」
道德及宗教的條例
22:16 「人若引誘猶未定婚的處女及伊做夥睏，彼個人著付聘金娶伊做某。
22:17 查某囝仔的老父若堅持毋將伊嫁互彼個人，處女的聘金彼個人著照納。
22:18 「做尪姨的，毋通互伊活。
22:19 「及獸交合的，一定著互伊死。
22:20 「除了上主以外，閣給別個神明獻祭的人，著給伊除滅。
22:21 「毋通欺負寄居的人，嘛毋通壓制𪜶；因為恁嘛曾寄居佇埃及。
22:22 毋通歹款待孤兒寡婦。
22:23 恁若真正歹款待𪜶，𪜶哀叫我，我一定會聽𪜶的哀叫，
22:24 欲對恁發大受氣，用刀刣恁，互恁的某做寡婦，恁的子兒做孤兒。
22:25 「你若錢借互我的子民中間的散赤人，毋通親像放利的人給𪜶提利息。
22:26 你若提厝邊的外袍做抵押，日落以前著還伊；
22:27 伊只有此領衫通蓋；若無，伊欲按怎睏？伊若對我哀求，我欲聽，因為我是慈悲的。
22:28 「毋通褻瀆上帝；嘛毋通咒罵人民的領袖。
22:29 「你著將收成的五穀、新油及新酒奉獻互上主，毋通延遲。
「你著將大子獻互我；
22:30 頭上生的牛及羊嘛著照按呢做；出世了通隨伊的母七日，第八日著歸互我。
22:31 「恁著做我聖潔的子民；佇野外互野獸拆裂的肉，恁毋通食，著㧒互狗食。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。