上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
歌革 — 上主的工具
38:1 上主對我講：
38:2 「人子啊，你著對瑪各地區的歌革傳達我的信息；伊是米設及土巴此兩個國家的統治者。
38:3 我 — 至高的上主按呢講：『米設及土巴的統治者歌革，我欲及你作對。
38:4 我欲用鉤仔鉤你的牙槽，給你拖翻頭，互你及你帶領的軍隊、戰馬、馬兵刣輸撤退。你的軍隊人多，有全套的武裝；𪜶手攑大細盾牌及刀劍。
38:5 你的軍隊有對波斯、古實，及弗倩來的戰士；𪜶嘛攏提盾牌，戴頭盔。
38:6 另外，歌篾人及極北旁陀迦瑪族的軍隊，以及多多人嘛隨你來。
38:7 你及聚集佇你遐的大軍著準備好勢；你著做𪜶的指揮官。
38:8 過一段時間，我欲差派你佇將來出兵征服以色列；伊的人民曾脫離刀劍的災難，對列國轉來，聚集佇以色列拋荒的眾山安然徛起。
38:9 你及你的大軍，以及真多隨你的外族人，欲親像暴風掃來，親像烏雲蓋密此塊土地。』
38:10 「至高的上主對歌革按呢講：『彼時，你的心欲圖謀歹事。
38:11 你想講：我欲侵入彼塊無設防的地，去平安生活的人民遐；𪜶徛起的所在無牆、無門、無閂。
38:12 我欲去遐攻擊以前拋荒，現在有人住的地，攻擊許個對列國轉來，積聚真多牲生及財寶，住佇全地中心的人民；佇遐搶奪𪜶的財物。』
38:13 示巴人、底但人，及對他施附近逐城鎮來的生理人欲問你：『你想欲搶牲生，搶奪金銀財寶是無？你想欲將所有的物件攏搶搶去是無？』
38:14 「所以，人子啊，你著對歌革傳達我的信息，講：至高的上主按呢講：『你明明知我的子民以色列平安過日，
38:15 竟然對極北旁你住的所在，導強猛的大軍騎戰馬來。
38:16 歌革啊，你來攻打我的子民以色列；你的軍隊親像烏雲蓋密地面。過一段時間，我欲導你去侵略我的土地，通互列國認識我；我嘛欲通過你，對𪜶證實我是神聖。
38:17 你就是我早前通過我的僕人，以色列的眾先知所預言彼個人。彼時，我曾通過我的僕人 — 以色列的眾先知傳達我的信息，我欲導你來攻打以色列。』至高的上主按呢宣告。」
上主刑罰歌革
38:18 「至高的上主講：『歌革侵略以色列彼日，我欲發大受氣。
38:19 我歸腹肚火大受氣宣告：佇彼日，以色列欲有大地動。
38:20 海裡的魚、空中的飛鳥、田野的走獸、地上的動物，以及所有的人，攏欲佇我的面前皮皮惙。高山欲爆裂，山崁欲崩去，城牆欲倒壞。
38:21 我欲佇以色列眾山用刀劍攻擊歌革；伊的軍隊欲互相殘殺。我 — 至高的上主按呢宣告。
38:22 我欲用瘟疫及刀劍刑罰伊。我閣欲落大雨，摒冰雹，降大火、硫磺佇伊所帶領的軍隊及隨伊的外族人身上，
38:23 通過諸個，對列國顯明我家己，以及我的偉大及神聖。彼時，𪜶就知我是上主。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。