上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
用柏香樹比並埃及
31:1 第十一年，三月初一，上主對我講：
31:2 「人子啊，你著給埃及王及伊的人民講：
你的強盛，啥人會當及你比？
31:3 你看，亞述曾親像黎巴嫩的柏香樹，
枝葉青翠，樹林茂盛，
樹欉高大，樹尾抵天。
31:4 柏香樹有水潤澤；
地下水源互伊高大。
伊栽種的所在四周圍有江河；
支流灌沃田野所有的樹木。
31:5 所以，伊比其他的樹木較大欉；
因為水源充足，
伊的樹椏長閣多，葉茂盛。
31:6 空中的飛鳥佇樹椏作巢；
地上的走獸佇樹影下生產；
列國的人民攏佇伊的蔭影下徛起。
31:7 即呢大欉閣媠的樹！
樹高，樹椏長，葉茂盛；
樹根釘深，深入地下的水源。
31:8 上帝園中的柏香樹𣍐比伊較高；
松樹的樹枝𣍐比伊較長；
楓樹的樹椏𣍐當及伊比。
上帝園中的樹無一欉親像伊赫媠。
31:9 我互伊的枝葉茂盛，生做真媠；
上帝的園伊甸所有的樹攏欣羨伊。
31:10 「所以，我 — 至高的上主按呢講：此欉樹因為高大，樹尾高甲抵天，煞自高驕傲，
31:11 我就給伊交互列國中上強大的統治者；此個統治者欲照伊的邪惡給伊報應。我已經給伊棄拺。
31:12 兇惡的外國人給伊斬斷，㧒确。伊的枝葉落佇山頂及山谷中，樹枝折去落佇河邊；樹影下列國的人民攏離開。
31:13 空中的飛鳥欲歇佇倒落去的樹箍；田野的走獸欲倒佇落落去的樹枝。
31:14 以後，栽種佇水邊的樹無通閣因為大欉，高甲抵天自高驕傲。許個樹攏欲枯焦，親像驕傲的世間人死去，及死人做夥落去陰間。
31:15 「至高的上主閣講：彼欉大欉樹落去陰間的時，我欲蓋深淵，截斷江河，互水流停止來表示哀傷。我欲互烏暗遮蓋黎巴嫩山，互樹林內的樹木攏枯焦。
31:16 我給伊㧒落陰間，互伊及落深淵的死人做夥的時，伊摔落去的聲搖動列國。伊甸園的樹，以及黎巴嫩水源充足、上好上媠的樹木，攏欲佇陰間得著安慰。
31:17 諸個樹攏欲及彼欉大欉樹落去陰間，及互刀刣死的人做夥。所有住佇彼欉樹蔭影下的人攏欲受放逐去列國。
31:18 「你的榮光及高大，伊甸園內面的樹木有叨一欉會當及你比？毋拘，你欲及伊甸園內面的樹木像款互人㧒落陰間，及許個無受割禮以及互刀刣死的人做夥。這是指埃及王及伊的人民講的。至高的上主按呢宣告。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。