上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
上主欲刑罰埃及
30:1 上主對我講：
30:2 「人子啊，你著講預言；你著講至高的上主按呢講：
慘啊，彼日！恁著大聲哀哭。
30:3 彼日到啦！上主的日逼近啦！
彼日是烏雲密布、列國受刑罰的日子。
30:4 埃及欲抵著戰亂，
古實會感受痛苦。
埃及人受屠殺的時，
人民的財富欲互人搶去；
伊的根基完全受拆毀。
30:5 古實人、弗人、呂底亞人、阿拉伯人、故普人，以及及埃及結盟的攏欲及埃及人做夥死佇刀下。
30:6 「上主按呢講：『對北部的密奪到南部的色弗尼，所有支持埃及的人攏欲死佇刀下；埃及誇耀的權勢欲降低變做卑微。我 — 至高的上主按呢宣告。
30:7 埃及欲變做世間上拋荒的所在，無一個城鎮會比埃及的城鎮閣較荒廢。
30:8 我放火燒埃及的時，所有幫贊埃及的嘛欲受剿滅。彼時，𪜶就知我是上主。
30:9 「『彼日，我欲派使者坐船去古實人遐；安穩自在的古實人欲驚惶，欲有親像埃及所受的痛苦臨到𪜶。看咧，諸個事連鞭欲發生！』
30:10 「至高的上主按呢講：『我欲通過巴比倫王尼布甲尼撒，剿滅埃及的人民。
30:11 伊欲帶領列國中兇惡的軍隊來毀滅埃及。𪜶欲用刀攻擊埃及人，互屍體滿四界。
30:12 我欲互尼羅河焦硞硞，給埃及交佇邪惡的人手中。我欲通過外國人毀壞埃及的一切。我上主按呢宣告。』
30:13 「至高的上主按呢講：『我欲毀滅偶像，對孟斐斯除去神像；埃及無閣有君王；我欲互埃及人活佇驚惶的中間。
30:14 我欲互埃及的巴特羅變做荒埔，用火燒瑣安，刑罰大城底比斯。
30:15 我欲將我的大受氣摒佇埃及上堅固的要塞汛，嘛欲消滅底比斯的人民。
30:16 我欲放火燒埃及；汛欲痛苦絞滾。底比斯的城牆欲受攻破，孟斐斯欲歸日受對敵攻擊。
30:17 希利坡里及比‧伯實的少年人攏欲死佇刀下，許個城的住民互人掠去。
30:18 我毀壞埃及的權勢，互伊誇耀的氣力終止的時，答比匿日時欲變做烏暗，烏雲給伊遮蓋，所有的住民攏欲受掠做俘虜。
30:19 我欲按呢刑罰埃及，𪜶就知我是上主。』」
拍斷埃及王的手骨
30:20 第十一年正月初七，上主對我講：
30:21 「人子啊，我已經拍斷埃及王的一支手骨，無人給伊醫治，包紮，互伊有力通攑刀。
30:22 所以，我 — 至高的上主按呢講：『我欲及埃及王作對，拍斷伊兩支手骨，給勇的及著傷的攏拍斷，互伊手內的刀落落土腳。
30:23 我欲給埃及人放逐去列國，四散佇全世界逐所在。
30:24 然後，我欲互巴比倫王的手勇壯有力，給我的刀交互伊。毋拘我欲拍斷埃及王的手骨，互伊佇巴比倫王面前親像受傷欲死的人哼哼呻。
30:25 我欲互巴比倫王的手勇壯，互埃及王的手衰荏垂落去。我給我的刀交互巴比倫王，伊攑刀攻擊埃及的時，𪜶就知我是上主。
30:26 我欲給埃及人放逐去列國，四散佇全世界逐所在；彼時，𪜶就知我是上主。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。