上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
譴責泰爾王
28:1 上主對我講：
28:2 「人子啊，著給泰爾王講：『至高的上主按呢講：你心內驕傲，想講家己是神明，坐佇海中眾神的座位。雖然你心內按呢想，其實你是人，毋是神明。
28:3 你想你家己比但以理較聰明，明白所有的奧祕。
28:4 你靠家己的聰明及技巧得著財富，累積真多金銀佇庫房。
28:5 你運用做生理的聰明，增加你的財富。你因為家己的財富愈來愈驕傲！
28:6 「『所以，我 — 至高的上主按呢講：因為你想家己及神明仝款，
28:7 所以我欲導列國中上兇惡的外國人來攻打你。𪜶欲拔刀毀壞你用聰明建立的成就，互你失去光彩。
28:8 𪜶欲給你㧒落深坑，互你慘死佇海裡。
28:9 你豈會當對給你刣的人講你是神明？佇刣你的人手中，你不過是人，毋是神明。
28:10 你欲死佇外國人的手中，親像無受割禮的人死，死甲真見笑。我 — 至高的上主按呢宣告。』」
泰爾王的終局
28:11 上主對我講：
28:12 「人子啊，你著為泰爾王唱哀歌，給伊講：『至高的上主按呢講：你過去是完美的典範，充滿智慧，十全十美。
28:13 你曾住佇伊甸，就是上帝的園內面，用紅寶石、黃玉、金鋼石、青玉、紅瑪瑙、碧玉、藍寶石、綠寶石、赤玉妝飾家己；所有的寶石攏鑲金框。佇你受造彼日，我就攏為你準備好勢。
28:14 我設立你做基路伯，保護上帝的聖山，佇親像火啲𤏸光亮的寶石中間巡視。
28:15 對受造的日，你的行為正直，後來煞開始做歹。
28:16 你生理好閣做真大，煞犯罪，做真多強暴的事。所以，我給你趕離開我的聖山，互你抵著見笑。啊，守護者基路伯，我對親像火啲𤏸光亮的寶石中間給你趕走。
28:17 你因為英俊，內心驕傲；你出名，煞看輕智慧。所以我給你摔佇土腳，互諸王親目看著。
28:18 你因為罪過真多，做生理無公道，煞褻瀆你的聖所，所以我放火給你燒，互你佇人的目睭前變做火灰。
28:19 所有認識你的國家攏欲驚惶；你永遠消失，此款的結局互人著驚。』」
譴責西頓
28:20 上主對我講：
28:21 「人子啊，你著向西頓人講預言，指責𪜶。
28:22 著給𪜶講至高的上主按呢講：『西頓，我欲及你作對！我欲佇恁中間顯出我的榮光。我顯明我的神聖，施行審判的時，人就知我是上主。
28:23 我欲互瘟疫佇西頓流行，互西頓的街路攏是血；對敵攑刀對四面攻擊伊，受刣的人倒佇街路。按呢，人就知我是上主。』」
以色列欲受祝福
28:24 上主講：「過去看輕以色列人周圍的國家，𣍐閣親像鑿人的莿、傷人的蒺藜刺傷以色列，按呢人就知我是至高的上主。」
28:25 至高的上主按呢講：「我欲聚集受放逐去萬族的以色列人，萬族欲因為按呢知我是神聖；以色列人欲住佇𪜶家己的土地，就是我賞賜互我的僕人雅各的土地。
28:26 𪜶欲佇遐安居樂業；我刑罰周圍許個看輕以色列人的民族了後，以色列人欲起厝，開墾葡萄園，安然徛起。按呢，𪜶就知我是上主 — 𪜶的上帝。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。