上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
預言亞捫受刑罰
25:1 上主對我講：
25:2 「人子啊，你著對亞捫人講預言攻擊𪜶，
25:3 給𪜶講：『著聽上主的話！至高的上主按呢講：我的聖殿受褻瀆、以色列的土地拋荒、猶大人受放逐的時，恁竟然講：哈哈，以色列人嘛有此一日噢！
25:4 所以，我欲互東方來的民族征服恁，佔恁的土地做𪜶的產業。𪜶欲佇恁的土地紮營，定居，食恁田園的出產，飲恁羊群的奶。
25:5 我欲互拉巴城變做駱駝的牧場，互亞捫人的地成做羊群倒啲歇睏的所在。按呢，恁就知我是上主。
25:6 「『至高的上主閣講：因為恁充滿怨恨，看以色列地受災難做歡喜，手拍噗仔，腳趒跳。
25:7 所以我欲伸手攻擊恁，給恁交互列國做俘虜；我欲對萬民中給恁剿滅，互恁對萬國中消失。我欲除滅恁，恁就知我是上主。』」
譴責摩押
25:8 至高的上主講：「因為摩押人及以東人講，猶大國及別個國家無什麼無仝，
25:9 所以我欲互摩押邊界的城鎮受攻擊，連𪜶上誇口的城堡，伯‧耶西末、巴力‧免，及基列亭，攏受攻破。
25:10 我嘛欲將亞捫人及摩押做夥交互東方來的民族做產業，閣互列國𣍐記得摩押。
25:11 我一定欲刑罰摩押。按呢，𪜶就知我是上主。」
譴責以東
25:12 至高的上主按呢講：「以東人因為對猶大人報仇，𪜶的報仇顯露𪜶極大的罪，
25:13 所以，我 — 至高的上主按呢講：我欲刑罰以東，給𪜶及𪜶的牲生消滅，互以東對提幔到底但的土地攏拋荒，人受刣死。
25:14 我欲用我的子民以色列的手對以東報復；𪜶欲照我極大的受氣報復以東。彼時，以東人就知這是我啲向𪜶報復。」至高的上主按呢宣告。
譴責非利士
25:15 至高的上主按呢講：「非利士人向猶大人報𪜶古早就結的冤仇，心存惡意欲消滅猶大人。
25:16 所以，我 — 至高的上主按呢宣告：我欲伸手攻擊非利士人，剿滅基利提人，連住佇沿海平原賰的人嘛欲消滅。
25:17 我欲嚴嚴給𪜶報復，發大受氣刑罰𪜶。我給𪜶報復的時，𪜶就知我是上主。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。