上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
兩個犯罪的姊妹
23:1 上主對我講：
23:2 「人子啊，以前有一對姊妹，是仝老母生的。
23:3 𪜶住佇埃及，少年的時就做妓女；在室女的時就互人摸𪜶的奶，耍𪜶的身軀。
23:4 大姊叫做阿荷拉，就是撒馬利亞；小妹叫做阿荷利巴，就是耶路撒冷。我娶𪜶兩姊妹；𪜶攏替我生囝仔。
23:5 「阿荷拉嫁我了後繼續做妓女。伊迷戀伊的愛人亞述。
23:6 𪜶是穿藍色的衫的領袖及軍官，攏是騎馬的戰士，英俊的少年人。
23:7 伊及諸個亞述人中間飄撇的少年人行淫，拜𪜶的偶像來拍垃墋家己。
23:8 伊無離開對埃及的時就有的淫亂。伊佇少年的時，就互人及伊睏；佇在室女的時，就互人摸伊的奶。人給伊當做放縱情慾的對象。
23:9 所以，我將伊交佇伊戀慕的愛人亞述的手中。
23:10 𪜶給伊褪光光，掠伊的子兒，閣用刀給伊刣死。伊受的刑罰，互伊佇婦仁人的中間留臭名。」
小妹阿荷利巴的罪
23:11 「伊的小妹阿荷利巴雖然有看著諸個代誌，卻比伊的大姊阿荷拉閣較墮落，閣較淫亂。
23:12 伊嘛迷戀亞述人；𪜶是穿全副軍裝的領袖及軍官，攏是騎馬的戰士，英俊的少年人。
23:13 我看見伊墮落拍垃墋家己；𪜶姊妹仔行仝條路。
23:14 「阿荷利巴比伊的大姊閣較淫亂。伊看見刻佇壁裡許個漆朱紅色的巴比倫人的像；
23:15 𪜶縖腰帶，頭殼包的頭巾隨風飄揚，看起來親像佇迦勒底出世的巴比倫指揮官。
23:16 阿荷利巴一下看見就戀慕𪜶，派使者去巴比倫見𪜶。
23:17 巴比倫人就來及伊睏，給伊侮辱拍垃墋。伊受拍垃墋了後，就及𪜶疏遠。
23:18 伊公然赤身露體，顯露伊的淫行。所以，我及伊疏遠，親像較早及伊的大姊疏遠像款。
23:19 伊思念少年的時佇埃及做妓女的日子，加添家己的淫行。
23:20 伊迷戀體格親像野驢赫呢壯，精力親像野馬赫呢足的愛人。
23:21 阿荷利巴啊，你渴慕你少年的時的淫行。你少年的時佇埃及就做妓女，互人摸你的奶，耍你的身軀。」
小妹應該受刑罰
23:22 「所以，阿荷利巴啊，我 — 至高的上主按呢對你講：『我欲激動你疏遠的愛人來攻擊你。我欲導𪜶來，對四面攻擊你。
23:23 𪜶有巴比倫人、迦勒底人、比割人、書亞人、哥亞人，閣有亞述人及𪜶做夥來；𪜶攏是飄撇的少年人，是騎馬的領袖、軍官，及戰士。
23:24 𪜶欲導大軍，用軍器、戰車，及補給車來攻擊你。𪜶夯大小盾牌，穿戰甲，戴頭盔，對四面圍攻你。𪜶欲替我給你刑罰，照𪜶的法律審判你。
23:25 我因為怨妒攻擊你，互𪜶發大受氣對付你。𪜶欲割你的鼻仔及耳仔，刣死你賰的人民。𪜶欲掠你的後生查某子，給賰落來的人燒死。
23:26 𪜶欲剝你的衫，搶你貴重的珠寶。
23:27 我欲互你無閣犯對埃及就有的淫行，互你無閣思念埃及，無閣期待𪜶的幫贊。』
23:28 「至高的上主閣講：『我欲給你交互你怨恨疏遠的人。
23:29 𪜶欲用怨恨對待你，搶奪你勞碌得來的財物，給你褪光光。你淫亂的身軀及行為攏欲露現互人看見。這是你的慾望及淫行惹來的。
23:30 你作列國的娼妓，拜𪜶的偶像拍垃墋家己。
23:31 你行恁大姊行過的路，所以我欲提伊飲過刑罰的杯互你飲。』
23:32 「至高的上主按呢講：
你欲飲你的大姊的杯；
此個杯深閣大，
貯滿刑罰。
你欲互人恥笑譏刺。
23:33 你的大姊撒馬利亞飲的杯，
是互人驚惶、悽慘的酒杯；
你欲醉茫茫，大憂苦。
23:34 你欲飲此個杯，飲到焦焦；
你欲摔破此個杯，閣割傷你的奶。
諸個事我已經講過，
至高的上主按呢宣告。
23:35 「所以，至高的上主按呢講：『因為你𣍐記得我，將我㧒佇尻脊後，你欲承受你的慾望及淫行造成的後果。』」
上主審判兩個姊妹
23:36 上主對我講：「人子啊，你著審判阿荷拉及阿荷利巴！你著指出𪜶所做通厭惡的事。
23:37 𪜶犯姦淫及刣人的罪。𪜶拜偶像行姦淫，將𪜶及我生的子兒燒互偶像做食物。
23:38 毋若按呢，𪜶仝彼日拍垃墋我的聖殿，干犯我的安歇日。
23:39 𪜶刣𪜶的子兒獻互偶像，仝彼日閣進入我的聖殿給伊褻瀆。這就是𪜶佇我的聖殿所做的代誌！
23:40 「𪜶閣派使者去真遠的所在請查甫人來。查甫人來，𪜶兩個姊妹就洗身軀，抹粉，畫目睭目眉，掛珠寶。
23:41 𪜶坐佇媠的眠床，將敬拜我的芳油下佇眠床頭邊仔的桌仔頂。
23:42 有歸陣對曠野來的人佇遐飲酒嬉嬉嘩嘩；𪜶將手環掛佇兩個姊妹的手裡，將花冠戴佇𪜶的頭殼頂。
23:43 講著此對姊妹仔，𪜶放縱淫亂致到衰老，現在人猶來及𪜶行淫，𪜶嘛及人行淫。
23:44 人一再來及阿荷拉、阿荷利巴兩個姊妹仔行淫，給𪜶當做妓女；𪜶做妓女及逐個人睏。
23:45 公正的人著判𪜶犯淫亂及刣人的罪；因為𪜶行淫，手沐刣人的血。」
23:46 至高的上主按呢講：「我欲召集一大陣群眾來攻擊𪜶，互𪜶驚惶，給𪜶掠去。
23:47 群眾欲用石頭給𪜶抌死，用刀劍刣死𪜶及𪜶的子、查某子，放火燒𪜶的厝。
23:48 我欲互此個國家無閣行淫，通警戒所有的婦仁人，毋通學𪜶的淫行。
23:49 人欲照恁的淫行刑罰恁；恁欲承擔拜偶像的罪。按呢，恁就知我是至高的上主。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。