上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
耶路撒冷的罪惡
22:1 上主對我講：
22:2 「人子啊，你著嚴嚴審判此個流人的血的城！著互伊清楚知家己所做一切可惡的事。
22:3 你著講，至高的上主按呢講：『你有殺害真多人的性命，閣拜偶像拍垃墋家己；你受刑罰的時到啦。
22:4 你犯刣人的罪，閣互家己造的偶像拍垃墋；你的時日到啦，你的歲數滿啦。所以，我欲互你受列國凌辱，受萬族恥笑。
22:5 你此個混亂閣臭名滿天下的城，無論是遠抑是近的國家攏欲恥笑你。
22:6 「『你看，以色列的首領濫用權力，殺害人民。
22:7 恁有人忤逆父母，欺壓寄居的，歹款待孤兒寡婦。
22:8 恁藐視我的聖所，無守安歇日。
22:9 恁有人造謠害死人；有人食山頂神廟的祭物，行淫亂。
22:10 恁有人及老父的某有性關係，及經期中的婦仁人做夥睏；
22:11 有人及別人的某私通；有人行淫亂侮辱新婦；有人給仝父的姊妹拍垃墋。
22:12 恁有人提錢刣人；有人毋若借人錢提利息，閣放重利；有人剝削厝邊賺不義之財。恁已經給我𣍐記得啦。至高的上主按呢宣告。
22:13 「『因為恁提不義之財及犯刣人的罪，我受氣頓桌仔。
22:14 當我刑罰恁的時，恁豈接載會牢？恁的手豈猶有氣力？我上主按呢講，一定按呢做。
22:15 我欲給你的住民趕散去列國，四散佇列邦。我欲消除你的污穢。
22:16 恁欲受列國侮辱，按呢恁就知我是上主。』」
上帝提煉的大火爐
22:17 上主對我講：
22:18 「人子啊，我看以色列人是一堆渣滓。𪜶親像提煉銀賰落來的銅、鐵、錫、鉛的渣滓。
22:19 所以，至高的上主按呢講：『因為恁成做無路用的渣滓，我欲給恁聚集佇耶路撒冷。
22:20 親像人收集銀、銅、鐵、錫、鉛佇大火爐提煉，我欲佇我的大受氣中給恁聚集佇此個城內燒熔。
22:21 我一定欲聚集恁，用我大受氣的炎火給恁燒，恁欲佇火中消熔。
22:22 銀按怎佇提煉的火爐內面熔去，恁嘛欲按呢佇耶路撒冷城內消熔。按呢，恁就知我上主向恁摒大受氣啦。』」
以色列領袖的罪惡
22:23 上主對我講：
22:24 「人子啊，你著給以色列人講：『恁的土地是無清氣的地。所以，佇我大受氣刑罰恁的時，無欲落雨互恁。』
22:25 𪜶的先知計謀歹事，親像噤噤哮的獅拆裂獵物。𪜶殺害人民，搶奪財寶，互真多婦女成做寡婦。
22:26 祭司曲解我的律法，褻瀆我的聖物。𪜶無分別什麼是神聖及無神聖的物，嘛無教人分辨什麼是清氣抑是無清氣的物，閣輕視我的安歇日。結果，我佇𪜶中間受褻瀆。
22:27 𪜶的領袖親像豺狼掠獵物拆裂𪜶；𪜶為著欲得著不義之財刣人取人的性命。
22:28 先知給許個領袖掩蓋罪惡，親像人用白灰抹壁。𪜶看的異象是假的，講的預言是白賊。𪜶講『至高的上主按呢講』，其實，我上主並無給𪜶講什麼。
22:29 住佇遮的人民慣勢壓制人，搶奪人的物件，欺負散赤困苦的人，剝削寄居的人，攏無照公道。
22:30 我佇𪜶中間啲尋，看是毋是有人佇我的面前為著此個國家修建城牆，徛佇城牆破隙的所在，互我𣍐給此個國家毀滅，毋拘尋攏無。
22:31 所以，我對𪜶摒落我的憤怒；我的大受氣欲親像火給𪜶燒。我欲照𪜶的所做給𪜶報應。」至高的上主按呢宣告。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。