上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
上主的刀
21:1 上主對我講：
21:2 「人子啊，你著面向耶路撒冷，傳講攻擊聖殿的話，講警告以色列的預言。
21:3 著對以色列人講，我上主按呢講：『我欲及你作對，欲拔刀刣恁，好人歹人攏剿滅。
21:4 我欲剿滅恁中間好人及歹人，所以我欲拔刀，對南刣到北，刣死所有的人。
21:5 逐個人就會知，我上主刀一下拔出，就無閣收回。』
21:6 「人子啊，你著佇𪜶的面前吐氣，親像苦痛慼心的人。
21:7 若有人問你：『你是按怎吐氣？』你著給𪜶講：『因為有風聲傳來，人心惶惶，人人腳軟手軟，失志破膽。災禍到啦，一定會發生。』」至高的上主按呢宣告。
21:8 上主對我講：
21:9 「人子啊，你著講預言，著講上主按呢講：
有一支刀，磨利利閣拭甲金熠熠。
21:10 磨利利是欲刣人，
拭甲金熠熠是欲互伊親像熠爁。
我的子民毋聽柺仔的警告，毋驚箠仔的刑罰。
按呢，咱有什麼通快樂？
21:11 刀已經拭甲金熠熠通用啦；
刀已經磨利，欲交互殺手啦。
21:12 「人子啊，著悲傷啼哭！
刀劍欲臨到我的子民，
欲臨到以色列的領袖；
𪜶欲及我的子民做夥受刣。
你著搥胸吐氣。
21:13 恁想看覓，
刀劍連有權柄的柺仔都毋驚，
猶有什麼𣍐發生？
至高的上主按呢宣告。
21:14 「所以，人子啊，你著受氣頓桌仔講預言：有一支刀一遍閣一遍不斷啲刜，刣死人，給人圍困屠殺。
21:15 我欲佇𪜶所有的城門邊指派此支刀去屠殺，互我的子民破膽，跋倒。唉啊，此支磨利利拭甲金熠熠的刀啲屠殺！
21:16 刀啊，你著刜正旁，刜倒旁；刀鋩向叨一旁就刜彼旁。
21:17 我嘛欲頓桌仔，我的受氣才會消。我上主按呢宣告。」
巴比倫王的刀
21:18 上主對我講：
21:19 「人子啊，你著將巴比倫王帶刀劍來進攻的兩條路線畫出來；此兩條路線攏著對仝一個國家作起點，閣佇此條路分叉欲去無仝款城市的所在𫞼路標。
21:20 刀劍欲經過的路，一條向亞捫的拉巴城，一條向猶大堅固的城耶路撒冷。
21:21 巴比倫王到分叉路，佇路口搖箭卜卦，查看獻做牲禮的肝，求問伊的偶像。
21:22 伊的正手提著的箭是指攻打耶路撒冷的箭，教𪜶準備挵城的槌，下令屠殺，大聲哄喝，造土堆，起高台，用挵城的槌攻打城門。
21:23 對許個咒誓及巴比倫結盟的猶大人看起來，卜卦的指示毋著；毋拘巴比倫王欲互𪜶會記得家己所犯的罪，嘛欲給𪜶掠去。」
21:24 至高的上主按呢講：「恁的罪過已經露現，眾人攏知恁的過犯；恁的行為顯出恁的罪惡。恁一定會受刑罰，互人掠去。
21:25 「你此個邪惡該死的以色列王，你罪惡貫滿，受刑罰的時間到啦。
21:26 我 — 至高的上主按呢講：『給王冠採起來！給禮帽提落來！情形無閣親像早前，代誌欲改變，無權力的人受高升，統治者欲落台。
21:27 我欲給此個城毀壞，毀壞，閣再毀壞。等我指派來刑罰的人到，此個國就無閣存在。彼時我欲將國交互伊。』」
刀及亞捫人
21:28 「人子啊，你著講預言，講：『關係亞捫人及𪜶對以色列人的凌辱，至高的上主按呢講：有一支磨利利，拭甲金熠熠的刀，已經拔出欲刣人。
21:29 恁看的異象是幻想，卜卦得著的預言是白賊。刀欲斬斷恁的頷頸。恁的罪惡貫滿，恁受刑罰的時間到啦。
21:30 「『收刀入鞘！我欲佇你的故鄉，你出世大漢的所在審判你。
21:31 我欲向你摒落我的痛恨，用我大受氣的火給你燒。我欲給你交互野蠻殘忍的殺手。
21:32 你欲親像柴互火燒；你的血欲流佇此塊土地，無人閣會記得你。我上主按呢宣告。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。