上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
責備假先知
13:1 上主對我講：
13:2 「人子，你著責備以色列許個照家己的意思講預言的先知，給𪜶講：『著聽上主的話。』」
13:3 至高的上主按呢講：「愚戇的先知慘啊！𪜶無看見什麼異象，干焦照家己的意思編造預言。
13:4 以色列人啊，恁的先知及住佇荒廢的所在的狐狸像款。
13:5 城牆的破隙，𪜶無去補，無修建，致到佇上主的日，抵著戰爭的時，以色列無法度徛在。
13:6 𪜶的異象是假的；𪜶的預言是白賊。𪜶講『這是上主講的』，其實，我上主無差派𪜶；𪜶竟然啲期待許個話實現。
13:7 我給𪜶講：『恁看見的異象豈毋是假的？恁講的預言豈毋是白賊？恁竟然講這是上主講的，其實，我無給恁講什麼！』」
13:8 所以，至高的上主按呢講：「因為恁的預言是虛假，恁的異象是幻想，我欲及恁作對。
13:9 我欲伸手攻擊許個編造虛假的異象，及講白賊的預言的先知。𪜶𣍐用得參加我子民的聚會，𣍐用得登記佇以色列家的名冊，嘛𣍐用得轉去以色列地。按呢，恁就知我是至高的上主。
13:10 「𪜶給我的子民導迷路，佇無平安的時講『平安』，親像起牆壁的時，𪜶給壁抹白灰。
13:11 你著給許個抹白灰的人講：『會有狂風暴雨及大冰雹給牆拍倒。』
13:12 牆倒壞了後，人欲問：『恁按呢抹有啥路用？』」
13:13 所以，至高的上主按呢講：「我欲發大受氣，用狂風暴雨及大冰雹拍倒此個牆。
13:14 我欲拆毀恁抹白灰的牆，拆甲平平平，露出地基；牆欲倒壞，恁欲死佇城內。按呢，恁就知我是上主。
13:15 「我欲對牆及給牆抹白灰的人發大受氣。我欲給𪜶講：『牆及抹白灰的人攏烏有去啊。
13:16 許個佇無平安的時，給耶路撒冷保證平安的先知攏無去啦。』」至高的上主按呢宣告。
責備假的女先知
13:17 上主講：「人子，你著當面責備許個照家己的意思講預言的查某人，
13:18 給𪜶講，至高的上主按呢講：『恁諸個查某人慘啊！恁給人的手骨縛符仔帶，互𪜶戴辟邪的頭巾，想欲控制人的性命。豈講恁想欲控制我子民的生死來求家己的利益？
13:19 恁為著幾把大麥、幾塊餅，佇我子民的面前褻瀆我。無應該死的，恁給𪜶刣死；該死的，恁留𪜶的性命。恁向許個無愛聽真實話的子民講白賊。
13:20 「『所以，至高的上主按呢講，恁著知，我痛恨恁用來操縱人性命的符仔帶。我欲剝恁手骨頂面的符仔帶，解救互恁控制的人，解放許個親像鳥仔互恁掠去的人。
13:21 我欲拆裂恁辟邪的頭巾，解救我的子民，互𪜶無閣受恁控制。按呢，恁就知我是上主。
13:22 「『我毋曾互義人傷心，毋拘恁講白賊互𪜶的心艱苦。恁鼓勵邪惡的人，無互𪜶悔改離開歹路來保全𪜶的性命。
13:23 所以，恁𣍐閣看虛假的異象，𣍐閣講白賊的預言。我欲解救我的子民脫離恁的手。按呢，恁就知我是上主。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。