上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
8:1 以西結看見第二個異象
耶路撒冷城內的偶像崇拜
第六年六月初五，我坐佇厝內，猶大的眾長老坐佇我的面前。至高上主的氣力充滿我。
8:2 我觀看的時，看見一個親像人的形像；伊的腰以下親像火，腰頂高親像會熠的金屬赫呢光。
8:3 伊伸出一支親像人的手扭我的頭毛。伊的神給我夯高到空中；佇異象中，伊的神帶我去耶路撒冷聖殿內埕的北門門口。佇遐有一個座位，頂面坐惹上帝受氣的偶像。
8:4 佇遐，我看見以色列上帝的榮光，及我佇迦巴魯河邊看見的像款。
8:5 上帝對我講：「人子啊，你看北旁！」我就攑頭向北看，看見祭壇門的北旁，佇入口有一身惹上帝受氣的偶像。
8:6 上帝閣對我講：「人子啊，你有看見以色列人佇遮啲做什麼？𪜶佇遮做極通厭惡的代誌，迫我離開我的聖所遠遠。毋拘，你會閣看見比這閣較通厭惡的事。」
8:7 伊導我去外埕的入口；我一下看，牆壁有一孔。
8:8 伊對我講：「人子啊，給牆壁挖迵過。」我一下挖迵過，就看見有一個門。
8:9 伊給我講：「入去，看𪜶佇內面所做通厭惡的歹事。」
8:10 我就入去看。我看見四面的牆壁刻逐款佇土腳啲趖的活物及通厭惡的走獸，嘛有以色列人拜的偶像。
8:11 有七十個以色列的長老徛佇許個像的頭前，沙番的子雅撒尼亞嘛佇遐。𪜶逐個人手捧香爐，香的煙淐高。
8:12 上帝對我講：「人子啊，你有看著以色列的長老，𪜶逐個人暗中佇充滿偶像的房間啲做什麼？𪜶講：『上主看𣍐著阮；伊已經棄拺此塊土地。』」
8:13 上主閣給我講：「你會閣看見𪜶做真可惡的歹事。」
8:14 然後，伊導我去上主聖殿的北門，佇遐有一群婦女坐啲，為搭模斯神明啼哭。
8:15 上主講：「人子啊，你有看見無？你欲看見比這閣較通厭惡的歹事。」
8:16 伊閣導我去上主聖殿的內埕。佇聖殿的門口，佇祭壇及走廊的中間，大約有二十五個人，尻脊向聖殿，面向東旁拜日頭。
8:17 上主給我講：「人子啊，你有看見無？你看，猶大人佇遮所做通厭惡的歹事豈是小可？𪜶佇全國逐所在做強暴的事，一再激我受氣。𪜶閣攑樹枝抵向鼻仔，用按呢侮辱我。
8:18 所以，我欲對𪜶發大受氣；無欲可憐𪜶，嘛無欲疼惜𪜶。就是講𪜶佇我的耳孔邊大聲呼求，我嘛毋聽。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。