上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
以西結剃頭
5:1 上主講：「人子啊，你著提一支利劍做剃頭刀，剃你的頭毛，剾你的嘴鬚，用天秤給𪜶秤，平分做三份。
5:2 城受圍困的日子滿了後，你著提三分一的嘴鬚及頭毛佇城內燒；提另外三分一去城外，給𪜶剁互幼幼；閣提賰的三分一撒佇空中，互風吹散，我嘛欲拔劍追趕𪜶。
5:3 你著留幾支毛，用你的衫仔裾包啲，
5:4 然後閣提幾支毛出來，㧒佇火裡燒。火欲對遐燒，湠到以色列全國。」
5:5 至高的上主講：「這就是耶路撒冷！我給伊下佇萬國的中心，互列國佇伊的四周圍。
5:6 毋拘伊違背我的命令及規例，比列國閣較邪惡，比伊周圍的國家閣較背逆。伊無守我的命令，棄拺我的規例。
5:7 所以，耶路撒冷！著聽我 — 至高的上主所講的話。你無守我的規例，棄拺我的命令，連四周圍列國的規矩嘛無遵守。
5:8 因為按呢，我 — 至高的上主宣布，我欲及你作對敵；我欲佇列國的面前審判你。
5:9 因為你做可惡的事，我欲刑罰你。我前到今毋曾按呢給你刑罰，以後嘛𣍐閣按呢刑罰你。
5:10 佇你境內，父母欲食𪜶的子兒，子兒嘛欲食𪜶的父母。我欲給你刑罰，欲給以色列所賰的人民攏流放去逐所在。
5:11 「所以，我 — 至高的上主用家己的活命立誓：你既然做通厭惡、通痛恨的事來拍垃墋我的聖殿，我欲給你消滅，無欲同情，無欲疼惜。
5:12 以色列的人民三分一欲因為瘟疫，抑是飢荒死；另外三分一欲佇城外四圍互刀劍刣死；賰的三分一我欲互𪜶攏四散去逐所在，嘛欲拔劍追趕𪜶。
5:13 「按呢，我的受氣才會消，我對𪜶的大受氣才會煞。𪜶就知我上主出佇激動熱切講諸個話。
5:14 我欲互你抵著見笑，互你變做荒埔，四周圍列國對遮經過的人攏欲恥笑你。
5:15 「我發大受氣、重重刑罰你的時，你欲佇四周圍的列國中受凌辱、恥笑；𪜶嘛欲因為你所受的刑罰著驚，受警戒。我上主按呢宣告。
5:16 我向註定滅亡的人射出飢荒毀滅的箭的時，我欲互飢荒閣較嚴重，欲斷絕恁的糧食。
5:17 我欲互恁抵著飢荒，受野獸侵犯，恁會失去子兒，嘛會抵著瘟疫、暴力，及戰爭。」上主按呢宣告。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。