上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶路撒冷受攻佔
39:1 西底家統治猶大第九年十月，巴比倫王尼布甲尼撒導伊的大軍來圍攻耶路撒冷。
39:2 西底家第十一年四月初九，耶路撒冷城受攻破。
39:3 城受攻破的時，巴比倫王的將領，包括尼甲‧沙利薛、三甲‧尼波、撒西金，另外閣一個尼甲‧沙利薛，以及巴比倫王其他的軍官攏來坐佇城的中央門。
39:4 猶大王西底家及所有的軍兵看著巴比倫大軍，就透暝逃走；對王宮花園的路，經過兩個城牆中間的門出城；王向亞拉巴的方向逃走。
39:5 巴比倫的軍兵追趇𪜶，佇耶利哥的平原趇著西底家，給伊掠起來，掠去巴比倫王尼布甲尼撒遐。彼時，尼布甲尼撒來佇哈馬地區的利比拉；伊就佇遐審判西底家。
39:6 巴比倫王佇利比拉刣死西底家的子，互伊親目看著，嘛刣死猶大所有的貴族。
39:7 後來巴比倫王挖西底家的兩蕊目睭，用銅鍊給伊鍊啲，欲給伊掠去巴比倫。
39:8 巴比倫人放火燒王宮及人民的厝，拆毀耶路撒冷的城牆。
39:9 彼時，侍衛長尼布撒拉旦將城內賰落來的人民、投降歸順的人，及其他的人民攏掠去巴比倫。
39:10 伊給人民中間什麼攏無的散赤人留佇猶大地，給葡萄園及田園分互𪜶。
耶利米受解放
39:11 關係耶利米，巴比倫王尼布甲尼撒命令侍衛長尼布撒拉旦，講：
39:12 「我將耶利米交代你，你著好好給伊照顧，毋通給伊傷害；伊有什麼要求，你著照按呢辦理。」
39:13 侍衛長尼布撒拉旦、將軍尼布沙斯班、將軍尼甲‧沙利薛，及巴比倫王的官長就派人
39:14 將耶利米對護衛隊的埕導出來，交互沙番的孫，亞希甘的子基大利，互伊給耶利米導倒去𪜶兜。對按呢，耶利米會當佇人民的中間徛起。
對以伯‧米勒的應允
39:15 耶利米猶關佇護衛隊的埕的時，上主對伊講：
39:16 「你去給古實人以伯‧米勒講：『上主 — 萬軍的統帥、以色列的上帝按呢講：我欲互我的話實現佇此個城；無欲賜福氣，是欲降災禍。到時，你會親目看著。
39:17 毋拘到彼日，我會救你；你𣍐互人交佇你啲驚的人的手。上主按呢宣布。
39:18 我一定欲救你；你𣍐互人刣死，性命會得著保全，因為你信靠我。上主按呢宣布。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。