上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米及利甲族
35:1 約西亞的子約雅敬做猶大王的時，上主給耶利米講：
35:2 「你去利甲族遐，給𪜶導來上主聖殿的一個房間，提酒互𪜶飲。」
35:3 我就去給哈巴洗尼雅的孫，耶利米的子雅撒尼亞，伊的兄弟、伊的後生，以及利甲全族的人，
35:4 攏導來上主的聖殿，入去伊基大利的子上帝重用的人哈難許個子的房間；彼個房間倚近官員的房間，佇沙龍的子聖殿門口的守衛瑪西雅房間的樓頂。
35:5 我用酒給酒壺、酒杯倒淀，下佇利甲族的人頭前，對𪜶講：「請飲。」
35:6 𪜶講：「阮無飲酒。阮的祖先利甲的子約拿達有給阮交代：『恁及恁的後代永遠都毋通飲酒。
35:7 毋通起厝，毋通撒種，毋通栽種葡萄，嘛毋通有葡萄園；著一世人住佇布棚，恁才會當佇寄居的地長歲壽。』
35:8 阮祖先利甲的子約拿達交代阮的話，阮攏有遵守。阮及阮的某子，一世人攏無飲酒，
35:9 無起厝住，無葡萄園、無土地、無種作，
35:10 干焦住佇布棚，攏照阮的祖先約拿達的命令。
35:11 巴比倫王尼布甲尼撒來攻打此塊土地的時，阮講：『行，咱來去耶路撒冷，閃匿巴比倫及敘利亞的軍隊。』按呢，阮才來住𫢶耶路撒冷。」
35:12 上主吩咐耶利米去給猶大人及耶路撒冷的住民講：「上主 — 萬軍的統帥、以色列的上帝按呢講：『恁無欲聽我的教示，毋順趁我的話是無？
35:13 併於上節
35:14 利甲的子約拿達交代伊的後代毋通飲酒，𪜶就攏遵守一直到今仔日。毋拘，我不斷給恁警戒，恁攏毋聽趁。
35:15 我一遍閣一遍差派我的僕人先知去恁遐，給恁講：恁逐個人著回頭，離開邪惡的道路，改正恁的行為，無閣去隨別個神明，服事𪜶，按呢恁就會當住佇我賜互恁及恁的祖先的土地。毋拘恁攏無欲聽，無欲遵守。
35:16 利甲的子約拿達的後代會當遵守𪜶的祖先互𪜶的命令，毋拘恁諸個人民攏無欲聽趁我。
35:17 所以，我上主 — 萬軍的統帥、以色列的上帝按呢講：我欲將我所講一切的災禍降互猶大人及耶路撒冷所有的住民；因為我給恁教示，恁無欲聽，給恁叫，恁無欲應。』」
35:18 後來，耶利米對利甲族講：「上主 — 萬軍的統帥、以色列的上帝按呢講：恁有聽趁恁的祖先約拿達交代恁的話，遵守伊所有的命令，照伊給恁吩咐的去做，
35:19 所以，上主 — 萬軍的統帥、以色列的上帝按呢宣布：利甲的子約拿達永遠有人佇我的面前侍奉我。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。