上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米買田園
32:1 猶大王西底家第十年，就是尼布甲尼撒統治巴比倫第十八年，上主對耶利米講話。
32:2 彼時，巴比倫的軍隊包圍耶路撒冷，先知耶利米互人關佇猶大王宮的監獄。
32:3 猶大王西底家給先知耶利米關啲，問伊講：「你是按怎預言上主按呢講：『我欲將此個城交互巴比倫王；伊會攻佔此個城。
32:4 猶大王西底家一定脫𣍐開巴比倫人的手，會互巴比倫王當面審問。
32:5 巴比倫王會給西底家掠去巴比倫，給伊留佇遐，到我給伊眷顧的時。上主閣講：恁及巴比倫人交戰，一定𣍐贏。』」
32:6 耶利米講：「上主給我講：
32:7 『你的阿叔沙龍的子哈拿默會來你遮，給你講：請你給我佇亞拿突彼坵園買轉去，因為你是我的至親，有權利贖回。』」
32:8 阮阿叔的子哈拿默果然來尋我，給我講：「請你給我買我佇便雅憫地區亞拿突彼坵園，因為你有繼承的優先權。請你買。」我就知，上主確實有給我講話。
32:9 我就用一百九十三公克的銀給我的叔伯兄弟哈拿默買彼坵園。
32:10 我佇契約書簽名，封起來，請人來做證人，秤銀互哈拿默。
32:11 我照法律的規定，將封密及無封密的買賣契約書，
32:12 當我的叔伯兄弟哈拿默、簽名的證人，及佇監獄內的猶大人面前交互瑪西雅的孫，尼利亞的子巴錄。
32:13 我佇𪜶的面前交代巴錄，講：
32:14 「上主 — 萬軍的統帥、以色列的上帝按呢講：將封密及無封密的契約書攏收𫢶瓷器內面，長期保存。
32:15 因為上主 — 萬軍的統帥、以色列的上帝講：將來，人會閣佇此個地買賣厝宅、田園，及葡萄園。」
耶利米的祈禱
32:16 我將買賣的契約書交互尼利亞的子巴錄了後，就對上主祈禱，講：
32:17 「啊！至高的上主，你有用權能及大氣力的手創造天地；無一項事你做𣍐到。
32:18 你用慈愛對待千萬人，毋拘照序大人的罪給𪜶的後代報應。你是至大全能的上帝，你的稱呼是上主 — 萬軍的統帥。
32:19 你的計劃偉大，做代誌有氣力；你注意啲看世間人的行為，照逐個人的所做給𪜶報應。
32:20 你佇埃及行神跡奇事，到今仔日，閣佇以色列人及世間人的中間按呢啲做，互你家己佇今仔日有名聲。
32:21 你行神跡奇事，用權能的手、有氣力的手骨，及大閣通驚的事，導你的子民以色列出埃及，
32:22 將你對𪜶列祖宣誓應允欲互𪜶流奶及蜜的地賜互𪜶。
32:23 𪜶一下入來佔領此塊土地，煞無聽趁你的話，無遵行你的律法；你命令𪜶著實行的，𪜶攏無做，所以你互𪜶抵著諸個災難。
32:24 今，對敵已經逼倚來，起土堆欲攻取此個城。此個城嘛因為戰亂、飢荒、瘟疫，陷落佇來攻擊伊的巴比倫人的手。上主你講的已經實現，你嘛已經看著。
32:25 至高的上主，此個城已經交互巴比倫人，毋拘你竟然叫我著用銀買田園，閣請人作證。」
32:26 上主就對耶利米講：
32:27 「我是上主，是全人類的上帝；豈有什麼事我做𣍐到？
32:28 我欲將此個城交互巴比倫王尼布甲尼撒及伊的軍隊，伊欲攻佔此個城。
32:29 攻取此個城的巴比倫軍隊會入來放火燒城，嘛將佇厝頂給巴力燒香，給外邦的神明獻奠酒祭，惹我受氣許個人的厝全部燒了了。
32:30 以色列人及猶大人對少年的時，就一直做我看做歹，激我受氣的事。上主按呢宣告。
32:31 此座城對起造的時到今仔日，不時激我發大受氣，所以我欲對我的面前給伊消滅。
32:32 因為以色列人及猶大人，包括𪜶的君王、官員、祭司、先知、耶路撒冷的住民，以及猶大人民攏做邪惡的事，惹我受氣。
32:33 𪜶尻脊骿向我，無欲正面看我。我雖然一遍閣一遍教示𪜶，毋拘𪜶攏無欲聽趁，毋受管教，
32:34 顛倒將可惡的偶像𫞼佇為著敬拜我來起的聖殿內面，給此間聖殿拍垃墋。
32:35 𪜶佇欣嫩子山谷起拜巴力的山頭壇，佇遐獻後生查某子互摩洛。諸個代誌我攏毋曾叫𪜶做，我連想嘛毋曾想過。𪜶竟然做諸個可惡的事，互猶大陷落罪。」
復國的應允
32:36 上主 — 以色列的上帝按呢講：「今，關係恁啲講因為戰亂、飢荒、瘟疫陷落佇巴比倫王的手的此個城，
32:37 我欲將伊的住民對我佇憤怒大受氣中給𪜶流放去的列國聚集起來，導倒來此塊土地，互𪜶佇遮安居樂業。
32:38 𪜶欲做我的子民，我欲做𪜶的上帝。
32:39 我欲互𪜶有仝一個心志，行仝條道路，永遠敬畏我，互𪜶及𪜶的子孫享受福氣。
32:40 我欲及𪜶立永遠的約，無欲閣放拺𪜶；我欲賜𪜶福氣，互𪜶全心敬畏我，𣍐閣越走離開我。
32:41 我欲歡喜施恩互𪜶，真誠盡心盡意給𪜶栽種佇此塊土地。」
32:42 上主閣講：「我按怎給諸個一切的大災禍降落互諸個人民，嘛欲親像按呢將我應允欲互𪜶的大福氣攏賜互𪜶。
32:43 恁所講此個已經交互巴比倫人，變做荒埔，無人嘛無牲生的所在，會閣有人來買賣田園。
32:44 佇便雅憫地區、耶路撒冷周圍，以及佇猶大、山地、山埔、尼革夫的城鎮，人欲用銀買賣土地，佇契約書簽名，給契約書封密，請人作證。我欲給受掠的人導倒來。」上主按呢宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。