上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
嗎哪及鵪鶉
16:1 以色列人全體會眾對以琳出發，佇離開埃及了後第二個月的十五日，來到以琳及西奈中間的汛的曠野。
16:2 𪜶佇遐埋怨摩西、亞倫。
16:3 以色列人給𪜶講：「阮寧可佇埃及地死佇上主的手頭。彼時，阮有歸鼎的肉，有餅通食到飽。恁給阮導來到此個曠野，是欲互阮所有的會眾攏餓死是無！」
16:4 上主對摩西講：「我欲對天落米糧互恁。𪜶逐個人逐日著出去拾彼一日的份；我欲按呢試驗𪜶，看𪜶有欲遵行我的命令抑無。
16:5 到第六日，𪜶著準備兩日的食物，拾平時的重倍。」
16:6 摩西、亞倫對以色列眾人講：「今暝恁就會知，導恁出埃及地的是上主。
16:7 明仔早起恁會看見上主的榮耀，因為上主有聽著恁對伊的怨言。阮算什麼，恁竟然埋怨阮！」
16:8 摩西閣講：「上主會互恁暗時有肉通食，早起時有米糧通食到飽；因為恁對上主的怨言，伊攏有聽著。阮算啥；恁毋是埋怨阮，是啲埋怨上主。」
16:9 摩西給亞倫講：「你著叫以色列人全體會眾來到上主的面前，因為伊已經聽著恁的怨言。」
16:10 亞倫抵啲對以色列人全體會眾講話的時，𪜶看見曠野有上主的榮光佇雲中顯現。
16:11 上主對摩西講：
16:12 「我已經聽見以色列人的怨言；你著給𪜶講：『到黃昏，恁欲有肉通食，早起時有米糧通食到飽，按呢恁就知我是上主 — 恁的上帝。』」
16:13 暗頭仔，有鵪鶉飛來，蓋滿歸個營地；透早，營地四圍有一重露水。
16:14 露水焦去，𪜶看著曠野的地面有細細圓圓的物，幼幼親像霜。
16:15 以色列人看著，毋知是什麼，互相講來講去：「這是什麼？」
摩西給𪜶講：「這就是上主互恁食的米糧。
16:16 上主按呢吩咐：恁著拾逐個人會當食的份量，一個人兩公升，照家內的人數去拾。」
16:17 以色列人照按呢去做，有的拾多，有的拾少。
16:18 到用器具量的時，拾多的無賰，拾少的嘛無欠；逐個人攏照𪜶食的份量去拾。
16:19 摩西給𪜶講：「毋通將賰的留到隔早起。」
16:20 毋拘有人毋聽摩西的話，將賰的留到隔早起，就生蟲臭去；摩西就對𪜶發受氣。
16:21 𪜶逐早起照逐個人食的份量去拾；日頭一下出，許個糧食就溶去。
16:22 到第六日，𪜶拾重倍的份，逐個人四公升；全會眾的領袖將此項事給摩西報告。
16:23 摩西給𪜶講：「上主按呢講：『明仔載是安歇的日子，是上主聖的安歇日；恁愛烘的今仔日就先烘起來，愛煮的就今仔日煮起來；賰的，著收啲，留到隔早起。』」
16:24 𪜶就照摩西的吩咐給賰的食物留到隔早起；諸個食物無臭去，嘛無生蟲。
16:25 摩西閣講：「恁今仔日就食諸個，因為今仔日是上主的安歇日；今仔日恁佇野地尋無米糧。
16:26 六日，恁通去拾，第七日是安歇日，此日恁無食物通拾。」
16:27 第七日，有人出去拾，尋攏無。
16:28 上主對摩西講：「恁毋肯遵守我的命令及教示，欲到底時？
16:29 恁著知，上主已經將安歇日賜互恁，所以第六日伊互恁兩日的米糧，第七日逐個人著𫢶佇家己的所在，毋通出去。」
16:30 人民就佇第七日安歇。
16:31 以色列人將此個物叫做嗎哪；伊親像芫荽的籽，色緻是白的，滋味親像摻蜜的薄餅。
16:32 摩西講：「上主按呢吩咐：『著貯兩公升淀淀的嗎哪，留互恁的後代。互𪜶看我導恁出埃及的時佇曠野互恁食的米糧。』」
16:33 摩西給亞倫講：「你提一個甕仔，貯兩公升淀淀的嗎哪，囥佇上主的面前，留互咱的後代。」
16:34 亞倫照上主吩咐摩西的話，將嗎哪留啲做見證。
16:35 以色列人食嗎哪攏總四十年久，一直到𪜶來佇有人住的所在。𪜶食嗎哪，直到𪜶來到迦南地的邊界。
16:36 當時量物件標準的單位是二十公升。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。