上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
猶大的罪及罰
17:1 上主講：「猶大人民啊，恁的罪是用鐵筆寫的，用鑽石刀刻的；寫佇恁的心版，刻佇恁祭壇的角。
17:2 恁攏啲數念佇逐個山崙仔、野地高的所在，及逐欉青翠的樹下面的祭壇及亞舍拉女神的柱像。因為恁佇境內的山頭壇所犯的罪，我欲互恁的財寶互對敵搶去。
17:3 併於上節
17:4 恁會失去我賜互恁的產業；我欲互恁的對敵給恁掠去恁毋識的國家服事𪜶，因為恁惹我受氣；我受氣的火永遠𣍐化。」
教導的話
17:5 上主講：
「倚靠世間人，
相信肉體的氣力，
心離開上主的人，
此款人會受咒詛。
17:6 𪜶會親像沙漠中的細欉樹仔，
幸福來的時看𣍐著；
𪜶會住佇焦燥的曠野，
無人徛起的鹹地。
17:7 「倚靠上主，專心信靠我的人，
此款人真有福氣！
17:8 𪜶親像樹栽佇水邊，
釘根佇溪水邊，
毋驚炎熱，
葉青翠茂盛；
曠旱的時攏毋免掛慮，
會不斷結果子。
17:9 「人的心比什麼攏較詭詐，
無藥通醫，
什麼人識會透？
17:10 我上主識人的心，
查驗人的心思，
欲照逐個人的所做報應𪜶。」
17:11 用無正當的手段發財的，
親像野鳥啲孵毋是家己生的蛋，
中年的時會失去財富，
到路尾會變做愚戇的人。
17:12 阮的聖所是榮光的寶座，
對古早就徛佇高高的所在。
17:13 上主啊，你是以色列的向望！
棄拺你的攏會見笑；
𪜶會消失，親像名寫佇土腳，
因為𪜶棄拺上主 — 活水的源頭。
耶利米求上主幫贊
17:14 上主啊，求你醫治我，我就會得著醫好；求你拯救我，我就會得著解救。你是我所稱讚的。
17:15 人對我講：「上主警告的話佇叨位？若有，著互伊實現。」
17:16 上主啊！我毋曾逃避做牧者的職份無跟隨你，嘛毋曾向望𪜶有一日會抵著災難。我的嘴所講的你攏知。
17:17 求你毋通給我嚇驚，因為你是我患難的時的避難所。
17:18 求你互迫害我的人見笑驚惶，毋通互我見笑驚惶；求你降災禍互𪜶，給𪜶徹底消滅。
著守安歇日
17:19 上主對我講：「你去徛佇猶大君王出入耶路撒冷會經過的便雅憫門，及逐個城門口，
17:20 對𪜶講：『猶大君王及人民，以及所有對諸個城門出入的耶路撒冷住民，著注意聽上主的話。
17:21 上主講：恁著細膩，毋通佇安歇日搬物件，對耶路撒冷諸個城門出入，
17:22 嘛毋通搬任何物件出門，無論什麼工作攏毋通做。著照我對恁祖先的命令，守安歇日做聖日。』
17:23 毋拘𪜶毋聽；𪜶硬心，毋受教。
17:24 「上主閣講：恁若注意聽我的話，無佇安歇日搬物件對諸個城門出入，守此日做聖日，無做任何工作，
17:25 按呢，恁就會有續接大闢坐王位的君王及𪜶的官員騎馬坐馬車，及猶大人、耶路撒冷住民，做夥對諸個城門出入；此個城嘛會永遠有人徛起。
17:26 恁嘛會有人民對猶大逐城鎮、耶路撒冷周圍逐庄社、便雅憫地區、山埔、山地，及尼革夫帶燒化祭、平安祭、素祭、乳香，以及謝恩祭來我的聖殿。
17:27 毋拘，𪜶若無欲聽趁我，無守安歇日做聖日，佇安歇日搬物件對耶路撒冷的城門出入，我就欲放火燒城門；大火會吞食耶路撒冷的宮殿，無人拍會化。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。