上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
猶大人民的災難
15:1 上主對我講：「就是摩西及撒母耳徛佇我的面前替猶大人民祈求，我嘛無欲憐憫𪜶。你著將𪜶對我的面前趕走，叫𪜶離開！
15:2 𪜶若問：『阮欲走去叨位？』你就給𪜶講，上主按呢講：
註定病死的，會病死；
註定戰死的，會戰死；
註定餓死的，會餓死；
註定受掠的，會受掠！
15:3 我上主已經決定，𪜶會抵著四項災害：死佇刀下、野狗拖去、空中的飛鳥啄去，及地上的走獸食去。
15:4 猶大王希西家的子瑪拿西佇耶路撒冷犯的罪，我欲互所有的人民看著就厭惡。」
15:5 上主講：
耶路撒冷啊，什麼人會可憐恁？
什麼人會為恁悲傷？
什麼人會越頭給恁請安？
15:6 恁已經離開我，越轉身毋插我；
我欲伸手攻擊恁，毀壞恁，
無欲閣憐憫恁。
15:7 我欲佇此所在逐個城鎮，將恁趕散，親像颺麥芒。
我欲消滅恁，刣死恁的兒女，
因為恁攏無悔改。
15:8 我欲互恁的寡婦比海沙較多；
我欲互毀滅者透中晝來，
攻擊少年人的老母，
互痛苦驚惶忽然臨到𪜶。
15:9 生七個兒女的老母衰弱無力；
伊的希望忽然消失，
伊就絕望見笑。
我欲互𪜶的對敵刣死𪜶賰落來的人，
上主按呢宣布。
耶利米吐露苦情
15:10 阿母，我真悽慘！你生我，我成做一個及全國人民衝突，互人指責的人。我毋曾借錢互人，嘛毋曾給別人借錢，毋拘所有的人攏給我咒詛。
15:11 上主，我若無盡心服事你，若無為著對敵的災禍對你懇求，願𪜶對我的咒詛實現。
15:12 豈有人會當摃斷鐵，特別是對北方來的銅及鐵？
15:13 上主講：「我的子民佇全國逐所在犯罪，所以我欲將𪜶的財富及寶貝互對敵搶去。
15:14 我欲互𪜶佇𪜶毋識的國家做對敵的奴隸；我的受氣親像炎火給𪜶燒滅。」
15:15 我就對上主講：「上主，你逐項攏知；求你會記得我，眷顧我；求你毋通寬容許個對敵，互𪜶來害我；你著會記得我是因為你的緣故受凌辱。
15:16 上主 — 萬軍的統帥上帝，你對我講的話，我逐句攏有聽，你的話互我的心歡喜快樂，因為我屬佇你。
15:17 我無及奢華宴樂的人做夥宴樂。我因為你的命令，家己一個靜靜坐啲，滿腹憤慨。
15:18 是按怎我的苦痛赫久𣍐煞？是按怎我受的傷𣍐醫得？你豈親像焦去的溪，親像𣍐靠得的水？」
15:19 上主就應我講：「你若越倒轉，我就閣接納你做我的僕人服事我；你若講寶貴的信息，無講無路用的話，就會當做我的代言人。按呢，人民會歸向你，毋拘你毋通順𪜶。
15:20 面對諸個人民，我欲互你成做堅固的銅牆。𪜶雖然攻擊你，毋拘𣍐贏你，因為我及你同在，欲解救你，保護你。
15:21 我欲救你脫離歹人的手，強暴的人的勢力。上主按呢宣布。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。