上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
通驚的曠旱
14:1 上主對耶利米講起有關曠旱的事。
14:2 猶大哀傷，伊的城鎮衰微，
人民坐佇土腳啼哭；
耶路撒冷啼哭的聲透到天頂。
14:3 好額人差奴僕去汲水；
𪜶去到水池尋無水，
帶空空的器具，
見笑，失望，罩頭殼倒來。
14:4 天無落雨，土地𤿎裂；
作穡人嘛失望罩頭殼。
14:5 因為無草料，
野鹿母放拺伊生的鹿仔子。
14:6 野驢徛佇無草高的所在，
親像豺狼喘大氣，
因為無草通食，目睭失神。
14:7 上主啊，阮的罪若控告阮，
雖然阮多多遍背叛你，
不時得罪你，
求你因為你的名的緣故拯救阮。
14:8 你是以色列的向望，
是阮艱難的時的救主。
你是按怎親像出外人，
過一暝就離開？
14:9 你是按怎親像著青驚，
無氣力救人的勇士？
上主，你確實佇阮中間，
阮是你的，
求你毋通離開阮。
14:10 關係諸個人，上主按呢講：「𪜶真愛照家己的意思四界走，無欲約束家己的腳步，所以我𣍐接納𪜶。今，我欲給𪜶的罪記啲，給𪜶刑罰。」
14:11 上主閣對我講：「你毋免為著諸個人民對我求情。
14:12 𪜶就是禁食祈禱，我嘛無欲聽；就是獻燒化祭及素祭，我嘛毋接納。我顛倒欲用刀劍、飢荒、瘟疫給𪜶剿滅。」
14:13 我就講：「至高的上主啊，許個先知曾對𪜶講：『恁𣍐有戰亂，𣍐有飢荒，因為上主有應允欲佇此個所在賞賜恁永遠的平安。』」
14:14 毋拘上主對我講：「許個先知用我的名講白賊。我無差派𪜶，嘛無命令𪜶，根本都無對𪜶講話。𪜶對恁講的預言是虛假的異象，是無路用的卜卦，是對𪜶心內出來詭詐的話。
14:15 所以，講著許個用我的名講白賊的先知，我無差派𪜶；𪜶講此個所在𣍐有戰爭及飢荒，我顛倒欲用按呢給𪜶消滅。
14:16 許個聽𪜶講白賊話的人民嘛會有像款的結局；𪜶及𪜶某子的身屍無人埋，會互人㧒佇耶路撒冷的街路。我欲因為𪜶的邪惡給𪜶報應。」
14:17 上主吩咐我著對諸個人民講：
願我的目屎暝日流無煞，
因為我所疼的人民受傷真嚴重。
14:18 我出去田野，
看著互刀刣死的人；
行入城，
看著因為飢荒煞破病的人。
祭司及先知流亡，
去到𪜶毋知的所在。
人民求上主憐憫
14:19 你豈完全棄拺猶大？
你豈真正厭惡錫安？
你是按怎給阮拍甲
互阮𣍐醫得？
阮期待幸福繁榮，毋拘無一項好；
阮期待醫治的機會，毋拘驚惶忽然來到。
14:20 上主啊，阮承認家己的罪，
承認阮祖先的罪過；
阮有得罪你。
14:21 求你因為你的名的緣故，無棄拺阮，
無互你榮光的寶座受侮辱；
求你會記得你及阮所立的約。
14:22 外族虛假的神明，叨一個會互天落雨？
天豈會家己落雨？
豈毋是只有你上主 — 阮的上帝才會！
阮的向望在佇你，
因為諸個一切攏是你造的。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。