上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
腰帶的譬喻
13:1 上主對我講：「你去買一條麻布做的腰帶來縖腰，毋通給伊浸佇水裡。」
13:2 我就照上主的話，買一條腰帶縖腰。
13:3 上主的話第二遍給我講：「將你買的腰帶縖啲。起來，去幼發拉底河，將彼條腰帶藏佇石頭縫。」
13:4 併於上節
13:5 我照上主的命令，將彼條腰帶藏佇幼發拉底河遐。
13:6 過真多日，上主閣對我講：「你趕緊去幼發拉底河，將我叫你藏佇遐的腰帶提來。」
13:7 我就去幼發拉底河遐，將我藏的腰帶挖出來。我一下看，腰帶已經爛去，無路用啦。
13:8 上主閣對我講：「我欲照按呢破壞猶大的驕傲，以及耶路撒冷閣較大的驕傲。
13:9 併於上節
13:10 諸個邪惡的人民毋肯聽我的話，隨𪜶固執的心去拜別個神明；𪜶會親像此條無路用的腰帶。
13:11 我愛以色列及猶大全家及我結連，親像腰帶及人的身軀結連，成做我的子民，互我得著名聲、稱讚，及榮光；毋拘𪜶毋聽趁。上主按呢宣告。」
酒甕的譬喻
13:12 你去對人民講：「上主 — 以色列的上帝給我講：著叫以色列人將酒給酒甕攏貯互淀。𪜶會講：『阮煞毋知逐個酒甕攏著貯互滿。』
13:13 你著對𪜶講：『上主按呢講：我欲用酒互坐佇大闢王位的、祭司、先知，及耶路撒冷所有的人攏飲甲醉。
13:14 我欲互𪜶醉甲起衝突，連父子嘛按呢。我無欲同情，無欲疼惜，無欲憐憫，一定欲給𪜶徹底消滅。』」
對驕傲的行為的警告
13:15 恁以色列人啊，
著注意聽，毋通驕傲。
上主已經按呢宣布。
13:16 佇上主 — 恁的上帝猶未互烏暗來到，
佇烏暗的山裡恁的腳猶未跋倒以前，
恁著將榮光歸互伊。
若無，伊會互死蔭的烏暗代替恁期待的光明。
13:17 恁若毋聽，
我會因為恁的驕傲暗中啼哭；
我會為著恁痛苦流目屎，
因為上主的子民互人掠去啦。
13:18 上主叫我對王及太后講：「恁著謙卑坐佇下面，因為恁頭殼頂媠的王冠已經落落去。」
13:19 尼革夫許個城的門關牢牢，無人出入；猶大人民攏受掠啦。
13:20 耶路撒冷，著注意看對北旁來的對敵。早前交代你照顧，你所誇口的人民，今佇叨位？
13:21 你以前栽培的盟友來統治你，你猶有什麼話通講？你會痛苦親像產婦催陣。
13:22 你想欲知：「是按怎我有諸個災難？是按怎我的衫互人拆破，我互人強暴？」是因為你犯的罪真重。
13:23 古實人若會當改變𪜶的皮膚色，豹改變𪜶的花點，恁諸個慣勢做歹的人，嘛會當做好。
13:24 上主講：我欲給恁趕散，親像曠野的風吹散草幼。這是恁應該得著的報應；因為恁已經𣍐記得我，去拜虛假的神明。
13:25 併於上節
13:26 我欲掀你的裙蓋你的面，互人看著你的見笑。
13:27 你佇山崙仔、佇野外服事許個神明，親像出聲行淫亂可惡的景象，我攏有看見。
耶路撒冷啊，你欲到底時才會清氣？你有災禍啦！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。