上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
宣告上主的約
11:1 上主對我講：
11:2 「你著聽清楚此個約的內容，然後給猶大人及耶路撒冷的住民宣布。
11:3 你著對𪜶講：『上主 — 以色列的上帝按呢講：毋聽趁此個約的話的人，一定會受咒詛。
11:4 此個約是我導恁的祖先出埃及，脫離鑄鐵的火爐的時命令𪜶的，講：恁著聽趁我的話，實行我所命令恁的，按呢恁就通成做我的子民，我做恁的上帝，
11:5 通實現我對恁的祖先所立誓的，將恁今仔日徛起此塊流奶及蜜的地賜互𪜶。』」
我應講：「上主，阿們！」
11:6 上主閣對我講：「你著去猶大的城鎮及耶路撒冷的街路宣布：『恁著切實遵行此個約的話。
11:7 我對導恁的祖先離開埃及彼日到今仔日，一再嚴嚴給𪜶警戒，叫𪜶著聽趁我的話。
11:8 毋拘𪜶毋若無欲注意聽，閣照𪜶固執邪惡的心做代誌。因為𪜶毋照我的命令遵守此個約，所以我照此個約給𪜶刑罰。』」
11:9 上主閣對我講：「佇猶大人及耶路撒冷的住民中間，有人計謀欲背叛我。
11:10 𪜶閣轉去犯𪜶的祖先毋聽趁我的話的罪，去服事別個神明。以色列家及猶大家攏破壞我及𪜶祖先所立的約。
11:11 所以，上主按呢講：『我欲降災禍互𪜶，𪜶無法度走閃。𪜶給我哀求，我嘛毋聽。
11:12 彼時，猶大逐城鎮的人及耶路撒冷的住民，會去哀求𪜶燒香服事的神明。毋拘佇𪜶抵著災難的時，諸個神明攏𣍐當給𪜶解救。
11:13 猶大啊，恁的神明親像恁的城鎮赫多；恁為著通見笑的巴力所起燒香的壇，親像耶路撒冷的街路赫多。』
11:14 耶利米啊，你毋免為著諸個人民祈禱，毋免為著𪜶大聲懇求，因為𪜶抵著災難的時對我哀求，我無欲給聽。」
11:15 上主對猶大人講：「我所疼的子民，恁做赫多歹，猶會當佇我的聖殿創什麼？恁下願、獻肉，豈就會給恁消除災禍，互恁心安歡喜？
11:16 我上主曾給恁號名做青翠、茂盛、結甲歸欉果子的橄欖樹，毋拘今我欲用雷公熠爁燒伊的樹葉，摃斷伊的樹椏。
11:17 「我上主 — 萬軍的統帥給恁栽種，毋拘今已經宣布欲降災禍攻擊恁；因為以色列人及猶大人攏做歹，向巴力燒香，惹我受氣。」
謀害耶利米
11:18 上主指示我，我才知有人欲對付我。
11:19 我親像一隻欲互人牽去刣馴良的羊仔，毋知𪜶設計欲謀害我。𪜶講：「咱給此欉樹及伊的果子攏毀掉！咱來給此個人刣死，互人𣍐記得伊的名。」
11:20 我就祈禱講：「上主 — 萬軍的統帥！你監察人的心思念頭，照公義審判。我將我的案件交互你，求你互我看著你替我主持公道。」
11:21 亞拿突人對我講：「你𣍐用得奉上主的名傳達伊的話，才免死佇阮的手頭。」針對許個欲謀害我的亞拿突人，
11:22 上主 — 萬軍的統帥按呢講：「我欲刑罰亞拿突人，𪜶的少年人欲死佇刀下，𪜶的後生查某子欲因為飢荒死。
11:23 𪜶連一個都𣍐當留啲，因為我刑罰𪜶的時，我欲降災禍互𪜶。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。