上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
摩西的歌
15:1 彼時，摩西及以色列人對上主唱此首詩歌：
我欲對上主唱歌，因為伊大勝利；
伊將戰馬及馬兵捙落海。
15:2 上主是我的氣力，我欲唱歌稱讚，
伊給我解救。
伊是我的上帝，我欲稱讚伊；
伊是我列祖的上帝，我欲尊崇伊。
15:3 上主是戰士；
上主是伊的稱呼。
15:4 埃及王的戰車及軍兵，上主給𪜶㧒佇海裡；
埃及王特選的軍官，攏沉落紅海。
15:5 大湧吞滅𪜶；
𪜶親像石頭沉到深的所在。
15:6 上主，你的正手有無比的權能；
上主，你的正手拍碎對敵。
15:7 你發出大威力，捙倒許個起來攻擊你的；
你發出大受氣，燒毀𪜶親像燒麥稿。
15:8 你鼻孔的氣互水淐高，
互大水疊歸堆；
海真深的水堅凍。
15:9 對敵講：「我欲追𪜶，欲趇著𪜶；
我欲分戰利品來足我的心願；
我欲拔刀給𪜶消滅。」
15:10 你一下歕風，
海水就給𪜶淹死；
𪜶親像鉛沉落大水。
15:11 上主啊，眾神明叨一個會當及你比？
叨一個親像你神聖威嚴，
通驚畏，受稱讚，行奇事？
15:12 你伸出正手，
地就給𪜶吞滅。
15:13 你用慈愛導你救贖的子民；
你用權能導𪜶進入你聖的所在。
15:14 列邦聽見就愕愕惙；
住佇非利士地的互痛苦包圍。
15:15 彼時，以東的族長驚惶；
摩押的英雄皮皮惙；
住佇迦南地的驚甲破膽。
15:16 卬愕驚惶包圍𪜶；
上主，因為你的大權能，
𪜶親像石頭𣍐振動，
聽候你的子民經過，
聽候你贖回的子民過去。
15:17 你欲導𪜶入去你產業的山，給𪜶栽培；
上主，遐是你為家己準備欲徛起的所在，
主啊，就是你的手所建立的聖所。
15:18 上主欲作王，直到永遠。
美莉安的歌
15:19 埃及王的戰馬、戰車，及馬兵跋落海的時，上主互海水回復原狀給𪜶淹密；毋拘以色列人佇海中行焦地。
15:20 亞倫的大姊，女先知美莉安，手提玲瓏鼓；眾婦女嘛提玲瓏鼓，隨伊那拍鼓那跳舞。
15:21 美莉安回應，唱講：
恁著唱歌稱讚上主，因為伊大勝利；
伊將戰馬及馬兵捙落海。
苦水變甘
15:22 摩西導以色列人對紅海向前行，到書珥的曠野；𪜶佇曠野行三日，尋無水。
15:23 到瑪拉的時，瑪拉的水會苦，𣍐飲得；𪜶給彼個所在叫做瑪拉。
15:24 人民埋怨摩西，講：「阮欲飲啥？」
15:25 摩西就求叫上主。上主指示伊一欉樹仔，伊將彼欉樹仔㧒佇水裡，水就變甘。
上主佇遐為著𪜶定規例及命令，佇遐給𪜶考驗。
15:26 上主講：「恁若注意聽我上主 — 恁的上帝的話，做我看做正直的事，真正聽趁我的誡命，遵守我所有的規例，我就𣍐互埃及人致著的病佇恁的身上發生，因為我是醫治恁的上主。」
15:27 𪜶到以琳，佇遐有十二個水泉，七十欉的棕樹；𪜶就佇遐的水邊紮營。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。