上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
8:1 上主講：到彼時，人欲將猶大的諸王、官員、祭司、先知，以及耶路撒冷住民的骨頭，對墓裡提出來，
8:2 㧒佇日頭、月娘、星辰的下面；諸個天體是許個人生前合意、服事、跟隨、卜卦、拜拜的。許個骨頭無人會閣給𪜶拾去埋，會佇土腳成做肥料。
8:3 此個邪惡的民族賰落來的人，佇我給𪜶流放去的國家無想欲閣活落去，寧可死。上主 — 萬軍的統帥按呢宣告。
罪及刑罰
8:4 上主吩咐我對伊的子民講：人跋倒，豈無欲𬦰起來；行毋著路，豈無欲越倒轉？
8:5 恁諸個耶路撒冷人，是按怎恁一下對我不忠就一直背叛我？恁哪固執愛欺騙，毋肯反悔？
8:6 我注意給𪜶聽，𪜶攏無講實話，無人為著家己所做的歹事反省講：「我哪會做此款歹代誌？」𪜶逐個人攏斡去行家己的路，親像戰馬衝入去戰場。
8:7 空中的鶴知影照季節遷徙，斑鴿、燕仔，及雁嘛知通照時間徙位，我的子民竟然毋識上主的命令！
8:8 恁哪會講「阮是有智慧的人；阮有上主的律法」？其實律法教師已經用𪜶白賊的文筆歪曲律法的意思。
8:9 許個有智慧的人會抵著見笑，會驚惶，會受審判。𪜶棄拺上主的話，哪有什麼智慧？
8:10 所以，我欲將𪜶的某互別人，𪜶的田園互人佔去。𪜶對上卑微的到上有權勢的攏數想不義之財，連先知及祭司都攏行為詭詐。
8:11 我的子民受著傷害，𪜶攏無要無緊。𪜶講：「平安無事！平安無事！」其實攏無平安。
8:12 𪜶做可惡的事，豈知見笑？𪜶實在有夠𣍐見笑！𪜶會親像別國的人互對敵刣死，我給𪜶刑罰，𪜶會完全毀滅。上主按呢宣告。
8:13 我欲互𪜶攏無收成；葡萄樹無生葡萄，無花果樹無結無花果，樹葉攏焦焦去。我互𪜶的，攏無去啦。上主按呢宣告。
8:14 人民講：「咱哪猶坐佇遮？咱著相招來去堅固的城，死𫢶遐！上主 — 咱的上帝註定欲給咱消滅啦，伊欲互咱飲苦水，因為咱有得罪上主。
8:15 咱期待和平繁榮，毋拘逐項攏無順利；期待醫治的機會，毋拘驚惶忽然來到。
8:16 戰馬嗙嗙哮的聲對但傳出來；勇壯的馬咻咻叫，大地因為𪜶的聲振動。對敵來欲毀滅此塊土地及地上所有的一切，吞滅諸個城鎮及內面的住民。」
8:17 上主警告伊的子民，講：「我欲派𣍐當用法術控制的毒蛇去恁遐咬恁。」
耶利米為同胞傷心
8:18 我傷心甲無藥通醫；
我的心神衰荏強欲暈去。
8:19 聽！我的同胞哀叫的聲，
對真遠的所在傳來：
上主豈無佇錫安？
錫安的王豈無佇城內？
上主講：
「𪜶是按怎拜雕刻的偶像，
拜外邦虛無的神明惹我受氣？」
8:20 我的同胞講：
「收成已經過，熱天已經結束，
毋拘阮猶未得著解救。」
8:21 我因為同胞受毀滅心碎去；
我非常悲傷，驚惶失神。
8:22 基列豈無乳香？
遐豈無醫生？
我的同胞哪猶未得著醫治？
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。