上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
無忠誠的以色列
3:1 「若有人給伊的某離婚，伊的某離開伊去嫁別人，伊豈通閣倒去尋此個前某？伊若按呢做，就是拍垃墋此塊土地。」上主講：你已經及真多愛人行淫，猶想欲倒來我遮是無？
3:2 你著攑頭看樹仔已經剉了了的山崙仔，猶有叨位毋是你行淫過的所在？你佇路邊啲聽候愛人，親像強盜佇曠野埋伏當等；你的淫亂及邪惡污染全地。
3:3 因為按呢，雨水停止，春雨無落。你猶面帶桃花，毋知見笑。
3:4 你抵即才對我叫講：「阿爸，對我細漢你就疼我。
3:5 人豈會一直受氣，永遠拾恨？」你雖然按呢講，毋拘猶拼勢啲做歹。
以色列及猶大著悔改
3:6 約西亞統治猶大的時，上主對我講：「你有看見背叛的以色列的所做無？伊上高山，佇逐欉青翠的樹下面行淫。
3:7 我想講伊做諸個代誌了後，會倒轉來我遮，毋拘伊無轉來；伊不貞的小妹猶大嘛有看著伊按呢做。
3:8 背叛的以色列淫亂，所以我互伊離婚書；伊不貞的小妹猶大攏毋驚，嘛去行淫。
3:9 以色列給行淫看做無要緊，去拜柴頭及石頭，就給此個土地拍垃墋。
3:10 雖然發生諸個代誌，伊不貞的小妹猶大猶假意歸向我，無欲真心轉來我遮。上主按呢宣告。」
3:11 上主閣對我講：「背叛的以色列比不貞的猶大猶較好。
3:12 你著去給佇北方的人講：上主按呢宣告：『背叛的以色列人，著轉來！我𣍐對恁變面，𣍐永遠對恁受氣，因為我對恁的疼永遠𣍐改變。
3:13 恁著認罪，因為恁有違背上主 — 恁的上帝，佇青翠的樹下面追趇外族的神明，無欲聽趁我的話！上主按呢宣布。
3:14 「『背逆的子兒，著轉來！上主按呢講。我才是恁的主人；我欲對逐個城選一個人，逐族選兩個人，給恁導倒來錫安。
3:15 我欲將合我心意的統治者賜互恁；𪜶會用智識及策略治理恁。
3:16 恁佇此塊土地人口大大加添的時，人𣍐閣講起上主的約櫃，𣍐閣數念，𣍐閣記得；𪜶無需要約櫃，𣍐閣製造。上主按呢宣布。
3:17 彼時，耶路撒冷會互人稱做上主的寶座；萬國萬民為著欲服事上主，攏欲聚集來遐；𪜶𣍐閣照家己邪惡固執的心做代誌。
3:18 彼時，猶大家欲及以色列家聯合，對北方做夥倒來我賜互恁祖先做產業的土地。』」
上主的子民拜偶像
3:19 上主講：
「我偌仔呢愛給你當做家己的子對待，
將世界上好的土地賜你做產業。
我想講你會叫我『阿爸』，
𣍐閣越走毋隨我。
3:20 毋拘，以色列啊，恁竟然背叛我，
親像婦仁人背叛丈夫離開伊。
上主按呢宣告。
3:21 佇樹仔剉了了的山崙仔有聽見聲，
是以色列人啲哮，啲祈求的聲，
因為𪜶行彎曲的路，
給上主 — 𪜶的上帝放𣍐記得。
3:22 恁諸個背逆的子兒，倒來啊！
我欲醫好恁背逆的病。
「恁講：『阮佇遮，阮轉來你遮啦，因為你是上主 — 阮的上帝。
3:23 佇小山鬧熱及大山吵鬧的拜拜，攏無路用，只有上主 — 阮的上帝才會當解救以色列。
3:24 阮對少年就啲拜的神明，害阮失去祖先勞苦得著的牛群、羊群、後生、查某子。
3:25 阮承認家己的見笑，承擔應該受的凌辱，因為阮對少年到今得罪上主 — 阮的上帝。阮及阮的祖先攏無聽趁上主 — 阮的上帝的話。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。