上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
上主眷顧以色列
2:1 上主的話臨到我，講：
2:2 「著對耶路撒冷人大聲喝講：『上主按呢講：
我會記得
你少年的時的愛情，
新婚的時的恩愛；
佇曠野，佇毋曾種作的地，
你給我隨牢牢。
2:3 以色列是上主聖的子民，
是上主初熟的果子；
所有吞食伊的攏有罪，
災禍會臨到𪜶。
上主按呢宣布！』」
以色列祖先的罪過
2:4 雅各的後代，以色列逐支族，著聽上主的話。
2:5 上主按呢講：
恁的祖先豈曾發見我有什麼毋著，
竟然離開我遠遠，去跟隨虛無的神明，
家己煞成做虛無。
2:6 𪜶無問：
彼個導阮出埃及，
導阮經過曠野及崎嶇的沙漠，
經過焦燥及烏暗的所在，
無人行過，無人住的地，
彼位上主佇叨位？
2:7 我導恁進入肥閣媠的地，
互恁食內面的果子及好的物件；
恁一下入來，就耍盪我的土地，
污染我賜互恁的產業。
2:8 祭司毋曾問「上主佇叨位」，
教律法的佯毋識我，
官員忤逆我；
先知奉巴力的名傳信息，
隨無路用的神明。
上主責備子民
2:9 所以，我上主講：
我欲控告恁，
欲及恁的後代爭辯。
2:10 恁著去西旁的基提諸個島看，
去東旁的基達調查，
看𪜶豈曾做此款代誌。
2:11 有叨一國曾換過𪜶的神明？
其實許個攏毋是神。
毋拘我的子民將𪜶榮光的上帝換做無路用的神明。
2:12 天啊，恁豈𣍐因為按呢著驚，
豈𣍐因為按呢驚惶皮皮惙？
上主按呢宣告。
2:13 我的子民做雙層的歹代誌：
𪜶放拺我此個活水的源頭，
去挖一個𣍐積水的水池。
以色列不忠的結果
2:14 以色列豈是奴隸？豈出世就做人的奴才？
哪會成做獵物？
2:15 對敵親像少壯的獅向伊噤噤哮，
對伊大聲喝。
𪜶互伊的地荒廢，
互伊的城毀壞，無人住。
2:16 埃及的孟斐斯人及答比匿人
剃光你的頭殼。
2:17 這豈毋是你家己惹來的？
上主 — 你的上帝導你行路的時，
你放拺伊。
2:18 今，你去埃及飲尼羅河的水豈會當得著什麼利益？
你去亞述飲幼發拉底河的水豈會當得著什麼好處？
2:19 你家己的罪惡欲刑罰你；
你家己的不忠欲控告你。
按呢，你就會清楚明白：
放拺上主 — 你的上帝，
無驚畏我，
是偌仔呢邪惡，偌仔呢不幸。
至高上主 — 萬軍的統帥按呢宣布。
以色列拒絕敬拜上主
2:20 你對古早就摃斷你的軛，
解開你的索，
講「我毋服事你」。
你佇逐個山崙仔，佇逐欉青翠的樹下面，
親像妓女倒啲。
2:21 你原來是我栽種特選的葡萄樹，
是純種的葡萄樹，
竟然給我變做野種的僫樹枝。
2:22 你用鹼，用真多雪文洗，
毋拘我猶看會出你罪惡的痕跡。
至高的上主按呢宣告。
2:23 你哪會講「我無拍垃墋家己，無去隨巴力」？
你看你佇山谷中的行為，就知家己的所做，
假若𠢕走的單峰駱駝母，四界亂闖。
2:24 你閣親像慣勢住佇曠野的野驢母，
慾火攻心的時就嗶帕喘，
𤞚的時，啥人給伊控制會牢？
公的驢仔真緊就會當尋著伊；
交配的季節，一定尋伊會著。
2:25 你毋通隨人走甲鞋破去，
毋通興甲嚨喉焦；
你竟然講：「無採工啦，無法度啦！
我都愛著生份人，
我欲隨𪜶走。」
以色列應該受刑罰
2:26 賊仔互人掠著，會按怎見笑，以色列家，包括𪜶的王、𪜶的官長、祭司，及先知，嘛會按呢見笑。
2:27 𪜶對柴頭講「你是我的老父」，對石頭講「你是我的老母」。𪜶尻脊骿向我，毋肯面看我；到抵著災難的時，才給我講：「求你來解救阮！」
2:28 恁為家己造的神明佇叨位？恁抵著災難的時，叫𪜶起來救恁！猶大啊，恁的神明親像恁的城鎮赫多！
2:29 恁哪欲及我爭辯？恁攏背叛我。上主按呢宣告。
2:30 無採我啲督責恁的子兒，𪜶攏毋肯受管教。恁用刀刣死先知，親像兇猛的獅啲吞食。
2:31 恁此世代的人，著聽上主的話！對恁以色列人來講，我豈親像曠野，抑是烏暗危險的地？我的子民哪會講「阮自由啦，無欲閣轉來你遮」？
2:32 少年的女子豈會𣍐記得伊的珠寶？新娘豈會𣍐記得家己的新娘衫？毋拘我的子民毋知偌久以前就𣍐記得我。
2:33 恁即𠢕尋愛人，連上歹的查某嘛著給你請教。
2:34 恁的衫仔裾有無辜、散赤人的血，其實𪜶並無偷提恁厝內的物件。
雖然恁做諸個代誌，
2:35 恁猶講：「我無罪！上主已經給我赦免啦。」著知，我一定會審問恁，因為恁無欲承認家己的罪。
2:36 恁哪闖來闖去，不時啲改變路向？恁投靠埃及，會親像以前倚靠亞述按呢自取見笑。
2:37 恁一定會親像俘虜，雙手𢯾頭殼離開埃及，因為上主已經棄拺恁所倚靠的；恁𣍐當因為投靠𪜶得著利益。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。