上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
奉獻頭上生的
13:1 上主對摩西講：
13:2 「以色列人著將頭上生的人及牲生，攏分別作聖歸互我；因為𪜶是我的。」
除酵節
13:3 摩西對以色列人講：「恁著會記得此日，因為上主佇此日用大權能的手給恁對埃及做奴才的家導出來；有酵的餅攏毋通食。
13:4 恁佇亞筆月的此日離開埃及。
13:5 將來上主會導恁進入迦南人、赫人、亞摩利人、希未人、耶布斯人徛起的地，此個地是伊對恁的祖先立誓欲賞賜互恁流奶及蜜的地，彼時恁著佇逐年的此個月遵守下面此個規例：
13:6 著食無酵餅七日；第七日是敬拜上主的節日。
13:7 此七日恁著食無酵餅；佇恁境內𣍐用得有酵母及有酵的餅。
13:8 佇此日，恁著教示恁的子，講：『這是欲記念上主佇我出埃及的時，為著我所做的事。』
13:9 恁著佇恁的手及頭額做記號，互恁常常暗唸上主的律法；因為上主有用大權能的手導恁出埃及。
13:10 所以，逐年此日若到，恁著守此個規例。」
頭上生的獻互上主
13:11 「上主導恁進入伊對恁及恁的祖先立誓，欲賞賜互恁的迦南地，
13:12 彼時，恁著將大子及所有頭上生公的牲生獻互上主；因為諸個攏屬上主。
13:13 頭上生的驢仔，著獻羊仔贖回；若無欲贖回，就著摃斷驢仔的頷頸；毋拘恁的大子攏著贖回。
13:14 以後恁的子若問恁講：『是按怎欲按呢做？』恁著給𪜶講：『上主用大權能的手導阮對埃及做奴才的家出來。
13:15 彼時埃及王固執毋放阮離開，上主就將埃及所有人的大子及牲生的頭上生的，攏刣死；所以，我將頭上生公的牲生獻互上主；將大子贖回。
13:16 你著佇你的手及頭額做記號，記念上主用大權能的手導阮出埃及。』」
雲柱及火柱
13:17 埃及王放以色列人離開的時，上帝無導𪜶行彼條經過非利士地較近的路；因為上帝講：「驚了諸個人民抵著戰爭，就後悔閣倒轉去埃及。」
13:18 所以上帝導以色列人斡對紅海曠野彼條路；以色列人攏武裝，對埃及地出去。
13:19 摩西帶約瑟的骨骸離開，因為約瑟有叫以色列人咒重誓，對𪜶講：「上帝一定會照顧恁，恁著帶我的骨骸做夥倒去。」
13:20 𪜶對疏割出發，佇曠野的邊界以倘紮營。
13:21 上主行佇𪜶的頭前，日時用雲柱給𪜶導路，暝時用火柱給𪜶照光，互𪜶日時暝時攏會當行路。
13:22 日時的雲柱，暝時的火柱，攏無離開以色列人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。