上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
上主選立塞魯士
45:1 上主選立塞魯士作王。
上主扶持伊，互伊有氣力征服列邦，
剝奪列王的權勢；
城門攏會佇伊的面前拍開，
𣍐閣關起來。
上主對塞魯士按呢講：
45:2 我上主欲親身替你開路，
欲削平大山小山。
我欲摃破銅的城門，
欲鋸斷鐵的門閂。
45:3 我欲將暗中的寶貝、
隱藏的財富攏互你；
按呢，你就會知我是上主，
我叫你的名呼召你。
我是以色列的上帝。
45:4 雖然你毋識我，
為著我的僕人雅各，
為著我揀選的以色列，
我猶叫你的名呼召你，賜你名號。
45:5 我是上主，其他無別個；
我以外，無別個上帝。
雖然你猶毋識我，我欲互你氣力，
45:6 按呢，對日出到日落的所在，
人人攏會知，我以外無別個；
我是上主，以外無別個。
45:7 我創造光，閣造暗；
我賜平安繁榮，嘛降災難。
我上主欲實現這一切的代誌。
45:8 天啊，著降落勝利，
親像雨水對頂面摒落。
地啊，著拍開，互拯救開花，
互勝利結籽。
我上主欲成就此個事！
創造及歷史的主宰
45:9 及造物主爭論的人慘啊！
伊不過是地上瓦片中的一片。
黏土豈敢對燒瓷師傅講：「你啲創啥？
你的功夫無好！」
45:10 敢給老父講「你哪給我生做按呢」，
敢給老母講「何麼苦生我」，
此款人慘啊！
45:11 以色列神聖的上帝 —
創造以色列的上主按呢講：
恁無權通質問我的子兒的將來，
無權指示我應該著做什麼！
45:12 我是大地的創造主，
閣創造住佇彼頂面的人類。
我親手搋開穹蒼，
指揮天頂的星辰。
45:13 我興起塞魯士互伊得著勝利，
修直伊所欲行的道路。
伊欲重建我的城耶路撒冷，
欲解放我受掠的子民；
伊按呢做毋是欲賺工錢，嘛毋是因為互人買收。
上主 — 萬軍的統帥按呢宣布。
45:14 上主對以色列按呢講：
埃及及衣索匹亞的財富攏會變做你的；
大閣躼的西巴人攏變做你的奴隸，
𪜶會互鎖鍊鍊啲，隨你的尻脊後行。
𪜶會跪落去拜你，恭敬對你講：
上帝確實及恁同在，
只有伊是上帝，以外無別個。
45:15 救贖主 — 以色列的上帝，
你真正是隱密家己的上帝。
45:16 製造偶像的攏會見笑漏氣；
𪜶攏會做夥受恥辱。
45:17 毋拘以色列受上主拯救。
恁得著的救恩會續到永遠；
恁永遠𣍐閣受侮辱。
45:18 上主創造天；
伊就是彼位唯一的上帝。
伊創造，形成，建立大地。
伊無互大地變做渾沌荒廢，
反轉互伊成做人徛起的所在。
伊講：我是上主，以外無別個。
45:19 我毋曾佇隱密的所在講話，
嘛毋曾佇烏暗的地談論。
我毋曾給以色列的後代講：
恁著佇渾沌中尋求我。
我上主只有講公義，
只有宣告正直。
世界的主及巴比倫的偶像
45:20 上主講：
來，恁諸個對列邦逃脫的人，
攏聚集倚來，接受審判！
許個扛柴刻的偶像遊街，
閣對無力通救𪜶的神明祈禱的人是無知。
45:21 來，恁去彼此參詳，提出恁的訴狀。
啥人對古早就知此個代誌？
啥人真早以前就宣告此個事？
豈毋是我上主？
我以外無別個上帝。
我才是公義的上帝，
我以外無別個會拯救人！
45:22 天邊海角的人啊，
著歸向我通得著救！
我就是上帝，其他無別個。
45:23 我指家己立誓；
我憑公義講出的話絕對𣍐收回：
每一個腳頭窩攏會對我跪拜；
每一個嘴攏會對我宣誓。
45:24 人會講：只有通過上主
才會得著勝利及氣力；
所有對伊發受氣的人
攏會受恥辱。
45:25 所有以色列的子孫
攏會對上主得著勝利及榮耀。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。