上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
安慰的話
40:1 恁的上帝講：
「著安慰，安慰我的子民！
40:2 著鼓勵耶路撒冷的住民，
對𪜶大聲宣布：
𪜶做俘虜受的苦已經夠額；
𪜶犯的罪已經得著赦免。
𪜶為著所犯的罪
已經對上主受雙倍的刑罰！」
40:3 有聲啲喝講：
「著佇曠野為著上主準備道路，
佇荒埔為著咱的上帝開大路。
40:4 逐個山谷著填互滿，
大山小山攏削互平；
高低無平的地著鋪互平坦；
嵁硈的所在互伊變做平地。
40:5 彼時，上主的榮耀會出現；
全人類攏會看見。
上主親嘴按呢宣布。」
40:6 有聲啲喝講：
著宣布！
我問：欲宣布什麼？
著宣布：所有的人攏親像草，
𪜶的媠親像野地的花。
40:7 上主吹來的風一下掃過，
草就焦，花就謝。
確實，人不過親像草！
40:8 草會焦，花會謝，
毋拘咱的上帝的話永遠存在！
40:9 報好消息的錫安啊，
著𬦰上高山出力大聲喝；
報好消息的耶路撒冷啊，
著好膽，大聲對猶大的眾城講：
「看咧，恁的上帝！」
40:10 至高的上主帶權能啲來啦，
伊欲用權柄掌權；
及伊做夥的，有伊所解放的人，
行佇伊頭前的，有伊解救的子民。
40:11 伊欲親像牧者顧伊的羊群，
欲用手攔倚羊仔子，給𪜶抱佇胸前；
伊欲導許個互羊仔𠲿奶的羊母勻勻仔行。
𣍐當比的創造主
40:12 啥人曾用手心量海水，
用手掌測量天？
啥人會當用杯貯大地的土粉，
用秤仔秤大山小山？
40:13 啥人會當了解上主的心，
做伊的導師給伊指導？
40:14 啥人會當做伊的參謀，
教伊正直的路？
啥人會當教伊智識，
指示伊明智的道路？
40:15 佇上主眼中，列國不過是桶仔內的一滴水，
是天秤頂的土粉；
海島不過是極輕的塵埃！
40:16 黎巴嫩的樹林無夠做柴料燒，
樹林內的走獸嘛無夠做燒化祭獻。
40:17 佇上主面前，列國無算什麼；
對伊來看，逐項攏空空無存在！
40:18 按呢，恁欲用啥人來比並上帝？
恁欲用什麼形像來代表伊？
40:19 豈欲用偶像？
偶像不過是師傅鑄造，
金匠用金給伊包，用銀鍊仔給伊妝飾。
40:20 無錢通買金銀的人，
𪜶就揀𣍐爛的好柴，
尋𠢕的師傅給𪜶𫞼𣍐振動的偶像。
40:21 恁豈毋知，豈毋曾聽見？
對古早到今豈毋曾有人給恁講？
恁豈猶未明白大地按怎受創造？
40:22 上帝作王坐佇大地的穹蒼頂面；
地上的住民親像草蜢赫呢細。
伊搋開天，親像啲拖門簾，
展開天，親像啲搭布棚。
40:23 伊給統治者攏拖落來，
互世間的領袖消失去。
40:24 𪜶抵抵才撒種，
抵抵才栽種，
抵抵才釘根落土，
上主用風給𪜶吹，𪜶就焦去，
𪜶親像草幼仔互捲螺仔風吹散！
40:25 神聖的上帝問：
恁欲用什麼人及我比？
什麼人會當親像我？
40:26 恁攑頭向天看覓咧，
是啥人創造天頂萬象？
就是會曉算星辰的數目閣導𪜶出來，
會曉一個一個叫𪜶的名彼位。
伊的權能氣力大，
連一個都𣍐漏勾。
40:27 以色列啊，你是按怎埋怨，
雅各啊，你是按怎講
「上主毋知我受著的痛苦；
上帝無關心我的權益」？
40:28 你豈毋知，
豈毋曾聽著？
上主是永遠的上帝，
是全地的創造主；
伊𣍐厭嘛𣍐倦，
伊的智慧𣍐當測量。
40:29 厭倦的人，伊賜𪜶氣力；
軟弱的人，伊互𪜶能力。
40:30 連少年人都會厭會倦，
勇壯的人嘛會悿甲倒落去。
40:31 毋拘倚靠上主的人會得著新的氣力，
會親像鷹鳥搋翼飛高；
𪜶奔跑𣍐厭倦，
行遠路嘛𣍐暈倒。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。