上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
及埃及定無路用的條約
30:1 上主講：
「諸個背叛的子民，慘啊！
𪜶無照我的心意，家己定計劃，
無照我的旨意亂結盟約，
致到罪上加罪。
30:2 𪜶無問我就落去埃及，
尋求法老的保護，
通匿佇埃及的翼股下。
30:3 毋拘向望法老保護，變做恁的見笑；
期待埃及致蔭，顛倒互恁漏氣。
30:4 雖然𪜶的官長去到瑣安，
𪜶的使者派到哈內斯，
30:5 毋拘𪜶逐個人攏會受著侮辱見笑，
因為埃及𣍐當幫贊𪜶，
𣍐當互𪜶什麼利益，
只有互𪜶見笑漏氣。」
30:6 有關尼革夫野獸的信息：
猶大的使者將財物載佇驢仔的尻脊，
將財寶靠佇駱駝的尻脊骿。
𪜶經過艱難困苦的地，
佇遐有獅啲哮，
有毒蛇及飛蛇，
去到𣍐當救𪜶的國家遐。
30:7 埃及的幫贊完全無路用，
所以，我叫伊做「坐定定無路用的拉哈伯」。
背叛的子民
30:8 今你去，佇𪜶面前將諸個
刻佇石版，
寫佇冊裡；
佇欲來的日子，
通永遠做見證。
30:9 因為𪜶是背叛的子民，
欺騙的子兒；
上主的教示，
𪜶攏毋聽。
30:10 𪜶給先見講：「毋通看異象。」
𪜶給先知講：「毋通給阮講正確的預言；
著給阮講阮合意聽的話，
給阮預言無影跡的代誌。
30:11 阮欲離開正路，對直路越走，
無愛閣聽著以色列神聖的上帝的名。」
30:12 所以，以色列神聖的上帝按呢講：
「因為恁拒絕此個信息，
顛倒信賴壓迫，倚靠欺騙，
30:13 所以，此個罪佇恁身上會親像
高牆的𤿎痕爆裂，
忽然倒壞。
30:14 伊會親像瓷器互燒瓷師傅大力摔，
破甲碎糊糊，
無甲一塊會當提來
取火爐的火種，
舀水池的水。」
30:15 至高的上主 — 以色列神聖的上帝按呢講：
「著反悔安歇，恁就得著解救；
著鎮靜信靠，恁就得著氣力，
毋拘恁拒絕。
30:16 恁講『無愛！阮欲騎馬逃走』，
所以，恁會真緊逃走；
恁講『阮欲騎快馬逃走』，
所以，趇恁的人會追真緊。
30:17 對敵一個人喝，恁一千人逃走，
五個喝喊，恁全部走散；
賰的，親像山頂的一支旗杆，
山頭的一支大旗。」
上帝欲賜福互伊的子民
30:18 上主猶啲聽候欲施恩互錫安；
伊一定欲起來憐憫恁。
上主是公義的上帝；
所有聽候伊的人真有福氣！
30:19 徛起佇耶路撒冷，錫安的人民啊，恁𣍐閣再啼哭。伊聽著恁啼哭的聲，會施恩互恁；伊一下聽著就會應恁。
30:20 雖然主用艱難做飯，用困苦做水互恁，毋拘恁的老師𣍐閣匿起來，恁會親目看著恁的老師。
30:21 無論恁偏正旁抑是偏倒旁，恁會聽著後面有聲對恁講：「這是正路；恁著行此條路。」
30:22 然後恁欲將恁所雕刻鑲銀的偶像，及所鑄造包金的神像給𪜶拍垃墋，親像給無清氣的物挕拺，講：「閣互阮看著！」
30:23 主會落雨，互恁撒佇土裡的種籽生長，互土地所出的五穀好閣豐富。佇彼日，恁的牲生會佇寬闊的草埔食草。
30:24 犁園的牛及驢會食用鐕仔及耙仔颺清氣，閣摻鹽的飼料。
30:25 佇恁的對敵受大屠殺的日，𪜶的守望台倒壞的時，恁每一個大山高嶺攏會有溪水直直流。
30:26 佇上主包紮伊互伊子民受的傷，醫治伊給𪜶責罰的重傷彼時，月娘的光會親像日頭的光，日頭會發出七倍的光，親像七日久攏總的光。
上帝欲審判亞述
30:27 你看，上主本身對真遠的所在來；
伊的受氣親像猛烈的火啲𤏸，
親像密密的煙淐高。
伊的嘴唇充滿憤怒；
伊的舌親像啲吞滅的火。
30:28 伊的氣親像漲到頷頸的溪水；
伊欲用毀滅的篩仔篩列國，
用馬咬韁鬥佇𪜶的嘴，
給𪜶拖去死亡之地。
30:29 毋拘恁，上帝的子民，欲唱歌，
親像節期的暗暝啲慶祝；
心內歡喜，歕𥰔仔上上主的山，
上到以色列的石磐遐。
30:30 上主欲互人聽著伊威嚴的聲，
互人看著伊刑罰的手骨，
有極大的受氣，吞滅的火焰，
有脆雷、暴風，及親像石頭的冰雹。
30:31 亞述人會因為上主的聲驚惶，
因為伊會用柺仔拍𪜶。
30:32 上主每一遍用刑罰的柺給𪜶摃，
伊的子民攏會彈琴拍鼓配合；
佇爭戰的時，伊會出手及𪜶交戰。
30:33 陀斐特已經為著亞述王準備好勢，
彼所在的火窟深閣闊，
內面有火及真多木材；
上主的氣，親像啲燒的硫磺，
欲給木材點𤏸。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。