上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
𨃟過節
12:1 上主佇埃及地對摩西及亞倫講：
12:2 「恁著用此個月做恁的正月，做逐年的頭一個月。
12:3 恁著對以色列的全體會眾講：『此個月初十，逐個人著照家庭準備羊仔，一家一隻。
12:4 若厝裡的人少，一隻羊仔食𣍐了，著及隔壁厝邊做夥準備；照人數，照逐個人食的份量準備。
12:5 恁著對綿羊抑是山羊選一隻一歲、無缺點的公的羊。
12:6 恁著給羊仔留到本月十四；佇黃昏的時，以色列全體會眾著刣羊仔。
12:7 𪜶著提一寡血，抹佇𪜶食羊仔彼間厝雙旁的門徛及門楣。
12:8 彼暗著食羊仔的肉；肉用火烘，及無酵餅、苦菜做夥食。
12:9 𣍐用得食生的及用水煮的；肉著及頭、腳、腹內做夥烘來食。
12:10 諸個攏毋通留到隔早起；若留到隔早起，著用火燒掉。
12:11 恁食的時，腰著縖啲，鞋著穿啲，手著攑柺仔，嘛著趕緊食。這是上主的𨃟過節。
12:12 「『彼暝，我欲行透埃及地，拍死所有的頭上生的，無論是人抑是牲生；閣欲審判埃及所有的神明。我是上主。
12:13 恁若有佇恁的厝抹血做記號；我一下看著此個血，就會對恁遐𨃟過去；我拍埃及地的時，毀滅的災難𣍐臨到恁。』」
除酵節
12:14 恁著會記得此日是上主的節日，代代守此個節日做永遠的規例。
12:15 恁著食無酵餅七日；頭一日著對厝內將酵母清清氣。對頭一日到第七日，所有食有酵的物的人，攏著對以色列人的中間革出。
12:16 頭一日及第七日，恁著舉行聖會；此兩日，準備食的物件以外，其他的工作恁攏𣍐用得做。
12:17 恁著守除酵節，因為佇此日我導恁的軍隊對埃及地出來；所以恁著守此日做世世代代永遠的規例。
12:18 對正月十四下昏到二一下昏，恁著食無酵餅。
12:19 此七日內，恁逐個人的厝內𣍐用得有酵；食有酵的物的人，無論是恁的同胞抑是外族人，攏著對以色列會眾的中間革出。
12:20 有酵的物，恁攏𣍐用得食；佇此個節期內，恁無論住佇什麼所在，著食無酵餅。
設立𨃟過節
12:21 摩西召集以色列所有的長老，對𪜶講：「恁著為恁的家族揀羊仔，刣來過𨃟過節。
12:22 著提一把牛膝草，搵盆內的血，抹門楣及雙旁的門徛；天光以前，無論什麼人攏毋通出門。
12:23 上主欲行透全國，拍死埃及人；伊看著門楣及雙旁門徛的血，就會𨃟過彼個門，不准毀滅者入恁的厝給恁拍死。
12:24 恁著遵守此個規定，做恁及恁的後代永遠的規例。
12:25 將來恁進入上主所應允欲賜互恁彼個地，恁著遵守此個規例。
12:26 恁的子兒若問恁：『是按怎欲守此個規例？』
12:27 恁著講：『這是獻互上主𨃟過節的祭物。上主拍死埃及人的時，伊𨃟過住佇埃及的以色列人的厝，解救咱逐個家族。』」人民就仆佇土腳敬拜上主。
12:28 然後，以色列人離開，照上主對摩西及亞倫的命令去做。
2 10. 頭上生的受刣
12:29 佇半暝，上主刣死埃及地所有頭上生的；對坐王位的埃及王的大子到關佇監獄的犯人的大子，以及牲生的頭上生的，攏受刣死。
12:30 埃及王及伊所有的人臣，以及全部的埃及人，攏佇半暝起來；佇埃及全地有大啼哭的聲，因為無一家無死人。
12:31 埃及王半暝召摩西、亞倫來，講：「出去！恁及以色列人著離開我的人民出出去！照恁所講的，去敬拜上主；
12:32 嘛照恁的要求，連牛群羊群攏帶帶去。毋拘恁著給我祝福。」
12:33 埃及人趕以色列人著趕緊離開，講：「阮攏啲欲死啦。」
12:34 以色列人就提猶未囥酵的麵丸，下佇抄麵粉的器具內，用衫包起來，囥佇肩頭頂。
12:35 以色列人照摩西的話，對埃及人討金器、銀器，及衣服。
12:36 上主互以色列人得著埃及人好的對待，𪜶要求什麼，埃及人攏互𪜶。按呢，𪜶就搶奪埃及人的財物。
以色列人出埃及
12:37 以色列人離開蘭塞，向疏割出發，囝仔婦仁人無算，行路的壯丁大約有六十萬。
12:38 閣有真多混雜的群眾，以及牛群、羊群、真多牲生及𪜶做夥出去。
12:39 𪜶用對埃及帶出來無發酵的麵丸烘做餅，因為𪜶受趕離開埃及，真緊急，𣍐當為家己準備食物。
12:40 以色列人住佇埃及四百三十年久。
12:41 四百三十年一下滿，抵抵彼日，上主導伊的軍隊對埃及地出來。
12:42 此暝上主歸暝顧守𪜶，導𪜶出埃及地；以色列人著世世代代佇此暝向上主守夜。
𨃟過節的規例
12:43 上主對摩西、亞倫講：「𨃟過節的規例是按呢：𨃟過節的食物，外族人攏毋通食，
12:44 毋拘用銀買來的奴隸，若有受割禮就通食；
12:45 寄居的及倩來的工人攏毋通食。
12:46 著佇厝內食，連一塊都毋通提出去外面；羊仔的骨連一支都毋通摃斷。
12:47 以色列所有的會眾攏著按呢守節。
12:48 若有寄居佇恁中間的外族人，愛欲守𨃟過節敬拜上主，𪜶家內的查甫人著受割禮，才通及本族的人仝款守節；毋拘無受割禮的外族人攏𣍐用得食。
12:49 本族人及寄居佇恁中間的外族人，像款攏著守此個規例。」
12:50 以色列眾人就照上主命令摩西、亞倫的話去做。
12:51 就佇彼日，上主導以色列人，一隊一隊出埃及。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。