上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
第十個災難的警告
11:1 上主對摩西講：「我欲閣降一個災難互埃及王及埃及，後來伊才會放恁離開遮；伊放恁離開的時，會逼恁趕緊對遮出去。
11:2 你著給以色列人講，無論男女，逐個人攏著對𪜶的厝邊討金器、銀器。」
11:3 上主互以色列人得著埃及人的好款待；閣摩西此個人佇埃及地，嘛受埃及王的人臣及人民看做偉大。
11:4 摩西講：「上主按呢講：『下昏暗半暝，我欲佇埃及地行透透。
11:5 所有埃及地的大子，對坐王位的埃及王到挨磨的女婢的大子，以及攏總頭上生的牲生，攏會死。
11:6 埃及全地欲有哀傷啼哭的聲，以前毋曾有，將來嘛𣍐閣有。
11:7 毋拘佇以色列人的地區會真平靜，連狗仔都𣍐給人抑是牲生吠；按呢欲互恁知，上主有分別埃及人及以色列人。』
11:8 你所有的人臣欲來見我，仆佇我的面前，講：『拜託你及跟隨你的人民攏離開。』後來我才欲離開。」講煞，摩西氣沸沸離開埃及王出去。
11:9 上主曾對摩西講：「埃及王𣍐聽你的話，所以我欲佇埃及地行閣較多的神跡。」
11:10 摩西及亞倫佇埃及王的面前行這一切的奇事；毋拘上主互埃及王的心硬，毋放以色列人離開伊的地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。