上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
對流亡倒轉來
14:1 上主欲憐憫伊的子民以色列，閣一遍揀選雅各，給𪜶安置佇𪜶家己的鄉土。真多住佇𪜶中間外族的人會及𪜶聯合，歸屬雅各的後代。
14:2 真多國家會協助𪜶轉去𪜶的祖國；以色列家會佇上主的地得著外族人做男僕女婢。以前掠𪜶的今變做𪜶的俘虜，過去管轄𪜶的今欲受𪜶管轄。
巴比倫王佇陰府
14:3 上主互恁對悲傷、苦痛，對受強迫做苦工得著解放彼時，
14:4 你會對巴比倫王唱此首諷刺的詩，講：
壓迫者竟然滅亡，
伊的強暴消失啦！
14:5 上主已經摃斷邪惡者的棍，
拍斷統治者的柺！
14:6 𪜶佇大受氣的時不斷欺壓列國，
佇憤怒中殘酷管轄列邦。
14:7 全地得著安歇平靜，
所有的人攏歡喜唱歌。
14:8 連松樹及黎巴嫩的柏香樹都因為你的結局歡喜唱，講：
今你已經倒落去，
𣍐閣有剉柴的人來給阮剉。
14:9 大地下面的陰府轟動，欲迎接你的來臨。
地上統治者的陰魂攏受喚起，
列國君王的陰魂對𪜶的寶座起來，
歡迎你到位。
14:10 𪜶會開嘴對你講：
你及阮像款攏變軟汫！
你及阮攏相像啦！
14:11 你的威風及你琴瑟的聲攏落到陰府。
你睏的眠床鋪的是蟲；
你蓋的被是蛆。
14:12 天光早的啟明星啊，
你竟然對天落落來！
你此個列國的征服者啊，
你竟然跋落地面！
14:13 你心內按呢講：
我欲𬦰上天頂，
將我的寶座設佇上帝眾星辰的頂面。
我欲坐佇聚會的山頂，
佇極北旁的所在。
14:14 我欲𬦰上雲頂；
我欲及至高者平高。
14:15 毋拘，你會受擲落陰府，
到深坑上深的所在。
14:16 看見的人攏直直給你相，
心內想講：
此個豈毋是互大地搖泏，
互列國轟動彼個人？
14:17 此個豈毋是互世界變做荒埔，
毀壞城市，
毋放俘虜轉去𪜶兜彼個人？
14:18 列國的國王逐個攏真有尊榮，
安葬佇家己的墳墓。
14:19 毋拘你死無葬身之地；
你的身屍互人討厭，受人踐踏，
互真多受殺害的人的屍體蓋啲，
做夥落落去深坑的石頭遐。
14:20 你𣍐當及許個君王同埋葬，
因為你毀壞你的國，
殺害你的人民。
願歹人的後代
永遠互人𣍐記得。
14:21 因為𪜶祖先的罪，
恁著給𪜶的子孫全部屠殺，
才免𪜶閣興起，佔有大地，
佇世界逐所在起造城市。
上帝欲消滅巴比倫
14:22 上主 — 萬軍的統帥講：
我欲起來攻擊巴比倫，
欲擦消𪜶的名，剿滅死無去的人，
以及𪜶的子子孫孫。
上主按呢宣布。
14:23 我欲互巴比倫變做豪豬住的所在，
變做攏是路糊糜窟的所在。
我欲用毀滅的掃帚給伊掃。
上主 — 萬軍的統帥按呢宣布。
上帝欲毀滅亞述
14:24 上主 — 萬軍的統帥按呢立誓講：
我所計劃的，攏會發生；
我所決定的，攏會實現。
14:25 我欲佇我的地拍碎亞述，
欲佇我的眾山踐踏伊。
伊囥佇我子民的軛，我會給𪜶徙開；
伊下佇𪜶肩頭的重擔，我會給𪜶搬落來。
14:26 這是為著全地所定的計劃；
這是伸出去欲攻擊列國的手骨。
14:27 上主 — 萬軍的統帥已經做此個決定，
啥人會當給伊阻擋？
伊伸出去的手骨，
啥人會當互伊閣勼倒轉？
上帝欲毀滅非利士
14:28 亞哈斯王死彼年，上帝宣布下面的信息：
14:29 恁所有的非利士人啊，
毋通因為拍恁的棍已經斷來歡喜，
因為蛇一定會生毒蛇，
所生的是會飛的火蛇。
14:30 上主會牧養伊的子民中上散赤的；
欠缺的會當安然歇睏。
毋拘，我欲用飢荒殺害恁非利士的後代，
欲刣死恁所賰死無去的人。
14:31 城門啊，著啼哭！城市啊，著喉叫！
非利士啊，著驚惶皮皮惙！
有烏煙對北方啲落來；
軍兵向前進軍，
隊伍中無一個隨𣍐著陣。
14:32 咱欲按怎回答非利士的使者？
咱著給𪜶講：
上主設立錫安，
佇遐，伊的子民中困苦的會得著保護。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。