上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
用以賽亞的子做記號
8:1 上主對我講：「你提一塊大塊枋，用通用的字寫：瑪黑珥‧沙拉勒‧哈施‧罷斯。
8:2 我欲用可靠的見證人，就是祭司烏利亞及耶比利家的子撒迦利亞，為我作證。」
8:3 我及我的婦仁人女先知同房，伊就懷孕生一個查甫子。上主給我講：「給伊號名叫做『瑪黑珥‧沙拉勒‧哈施‧罷斯。』
8:4 因為囝仔會曉叫『阿爸』、『阿母』以前，大馬士革的財富及撒馬利亞得著的戰利品攏會互亞述王搶去。」
亞述王啲欲來啦
8:5 上主閣對我講：
8:6 「既然此個子民拒絕西羅亞慢慢仔流的水，顛倒去巴結利汛王及比加王。
8:7 所以，你的主欲導亞述王及伊兇猛的大軍，親像幼發拉底河強猛的水沖過河溝，滿過河岸，
8:8 流入猶大，淹到頷頸，造成氾濫。」以馬內利，上帝及咱同在！伊的翼搋開，蓋滿歸片土地。
8:9 列國的人民啊，做恁聯合結做堆；
恁會徹底受毀滅！
對遙遠的所在來的，著注意聽！
做恁備戰！恁會徹底受毀滅！
做恁備戰！恁會徹底受毀滅！
8:10 做恁去計劃，一定攏無採工！
做恁去想計策，一定𣍐成功！
因為上帝及阮同在。
上主警告先知
8:11 上主用大氣力的手牽我，警告我毋通隨此個人民的腳步行。伊講：
8:12 「此個人民啲講的陰謀，恁毋通隨啲講。𪜶啲驚的，恁毋免驚，嘛毋免懍。
8:13 恁著尊崇我上主 — 萬軍的統帥做聖，我才是恁所著驚畏，著惙的。
8:14 我會成做聖所，嘛會做互以色列兩國跋倒的石，塞礙的大塊石，做耶路撒冷住民的活罩及羅網。
8:15 真多人會佇彼頂面觸著，跋倒，受傷；𪜶會互人網著，掠著。」
禁止求問死人
8:16 恁著給律法的冊捲起來，佇我學生的中間給教示封起來。
8:17 我欲聽候上主；伊越頭無看顧雅各的後代，毋拘我欲仰望伊。
8:18 看咧，我及上主賞賜互我的子兒，攏是伊互以色列的兆頭及記號；上主是𫢶佇錫安山的上主 — 萬軍的統帥。
8:19 若有人給恁講：「恁著去問牽亡的及童乩桌頭；𪜶吱吱啾啾，用人聽無的話唸東唸西。人民豈𣍐用得求問𪜶的神明，抑是替活人去問死去的人？」
8:20 𣍐用得！著請示律法及教示！許個講話無照律法及教示的人，𪜶𣍐當看著天光。
患難的時陣
8:21 人會佇逐所在流浪、艱苦、枵餓；𪜶無通食的時會起受氣，咒詛𪜶的王及𪜶的上帝。𪜶攑頭看天，
8:22 俯落看地，只有看著艱苦、烏暗、苦悶，閣受趕入去烏烏暗暗內面。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。