上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
互亞哈斯的信息
7:1 烏西亞的孫，約坦的子，亞哈斯做猶大王的時，敘利亞王利汛及利瑪利的子以色列王比加進軍攻擊耶路撒冷，毋拘攻𣍐破。
7:2 有人給大闢家講，敘利亞及以法蓮聯盟；亞哈斯的心及人民的心攏驚惶皮皮惙，親像樹林內的樹互大風吹振動。
7:3 上主對以賽亞講：「你及你的子施亞雅述出去迎接亞哈斯，佇上池的水溝口，迵到漂布場的大路見伊，
7:4 給伊講：『著謹慎，著鎮靜，毋免驚。毋通為著此兩支啲淐煙的火把，就是啲大發受氣的利汛及𪜶敘利亞人，以及利瑪利的子，來驚惶失膽。
7:5 因為敘利亞及以法蓮，以及利瑪利的子計謀攻擊你，講：
7:6 阮欲上去攻擊猶大，侵佔，征服伊；阮欲設立他比勒的子作王。
7:7 所以，至高的上主按呢講：
此個代誌𣍐成功，
一定𣍐實現，
7:8 因為敘利亞的首都是大馬士革，
大馬士革的首領是利汛；
以法蓮的首都是撒馬利亞，
撒馬利亞的首領是利瑪利的子。
(六十五年內以法蓮一定滅亡。)
恁的信心若無在，恁絕對徛𣍐穩。』」
7:9 併於上節
以馬內利的記號
7:10 上主閣對亞哈斯講：
7:11 「著對上主 — 你的上帝求一個記號，無論對上低的深淵抑是上高的天頂來」。
7:12 毋拘亞哈斯回答：「毋，我毋求，我無欲試探上主。」
7:13 先知就講：「大闢家啊，著聽！恁互人厭惡，豈算小可事？恁豈嘛欲互我的上帝厭惡？
7:14 因為按呢，主欲親自互恁一個記號：看咧，有一個少年女子會懷孕生子；伊欲叫做『以馬內利』。
7:15 到伊學會曉拒絕惡，選擇善的時，伊欲有起司及芳蜜通食。
7:16 因為此個囝仔會曉拒絕惡，選擇善以前，恁所啲驚彼兩個王的國土攏會徹底荒廢。
7:17 上主會互亞述王帶來的患難臨到你、你的人民，及恁老父的家；這是以法蓮對猶大分裂以來毋曾有的患難！
7:18 「佇彼日上主會發令，對尼羅河的源頭召集胡蠅，閣對亞述地召集蜜蜂來。
7:19 𪜶攏會飛來歇佇崎的山谷、石壁縫，以及一切的莿及草埔。
7:20 「彼時，亞述王親像主對幼發拉底河對岸租來的剃頭刀，主欲用伊給恁的頭毛及腳毛，甚至恁的嘴鬚攏剃掉。
7:21 「彼時，一個人會飼一隻母的牛仔，兩隻母的綿羊；
7:22 因為有充足的奶，國內所有賰落來的人攏會當食起司及芳蜜。
7:23 「彼時，種一千欉葡萄，值銀一千的所在，攏會發莿雜草。
7:24 人著帶箭及弓才敢去遐；因為所有的土地攏互莿雜草蓋滿。
7:25 所有用鋤頭種作過的山地，因為有雜草莿，人毋敢閣去，變做放牛去食草，出在羊踐踏的所在。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。