上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
傳道書
毋通隨便下願
5:1 你若去上帝的殿，腳步著謹慎；進前來聽比戇人獻祭較好，因為𪜶干焦會曉做歹。
5:2 佇上帝面前你毋通隨便講話，嘛毋通急欲講；因為上帝佇天你佇地，所以你的話著少。
5:3 代誌多，厚眠夢；厚話會顯出愚戇。
5:4 你對上帝下願，著緊謝願；因為伊無愛愚戇的人；你下的願著謝。
5:5 下願無謝，寧可無下。
5:6 毋通因為你的話致到家己犯罪，嘛毋通佇上帝的使者面前講所下的願毋著。是按怎欲互上帝因為你的話受氣，破壞你的所做？
5:7 眠夢多，話就多，無意義的事嘛多；只有著敬畏上帝。
人生的空虛
5:8 你若看著散赤人受官員壓迫，抑是正直公義受剝奪，毋免因為按呢感覺奇怪；因為官員攏有較高的官啲給𪜶保護。
5:9 土地有好的收成，百姓才好過日，總是得著上大利益的是君王。
5:10 愛錢的𣍐因為錢知足；愛好額的𣍐因為所賺的知足。這嘛是空虛。
5:11 財富加添，靠伊食的人嘛加添；按呢伊有得著什麼利益？不過是看會著若定。
5:12 勞工無論食多食少攏好睏；好額人食甲飽飽嘛睏𣍐去。
5:13 我看見日光的下面有一項大不幸，就是財主錢守牢牢煞害著家己。
5:14 伊因為事業無順，錢財無去；有子嘛無什麼通留互伊。
5:15 伊褪裼出母胎，嘛會褪裼倒去；伊勞碌得著的，一項嘛𣍐當帶去。
5:16 伊來的時按怎，去的時嘛是按呢；這嘛是一項大不幸；伊勞碌掠風有什麼利益？
5:17 毋若按呢，伊一世人佇烏暗中啲生活，有真多煩惱，嘛有病疼及受氣。
5:18 照我看，上好的人生就是人佇上帝所賜有限的年日飲食，享受日光下面勞碌所得著的成果，因為這是伊應得的份額。
5:19 上帝若互人有財富、產業，通快樂享受伊勞碌得著的份額，這是上帝的恩賜。
5:20 伊毋免為著一生的年日操煩，因為上帝互伊的心充滿歡喜。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。