上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
傳道書
2:1 我對家己講：來，來追求享樂，看有什麼好處。結果，這嘛是空虛。
2:2 我講：耍笑是癲狂；享樂嘛是空空。
2:3 我想欲用酒互身軀爽快，過愚戇的生活。毋拘，我的心猶久愛互智慧引導，通知人短短的一生什麼是上好的生活。
2:4 我為著家己興起大工程：起真多厝，栽種葡萄，
2:5 修造花園及果子園，佇彼內面栽種逐種果子樹；
2:6 閣開水池灌沃樹林內的樹仔栽。
2:7 我有買男女奴隸，嘛有出世佇我家內的；閣有真多牛群、羊群，比我以前佇耶路撒冷許個人所有的較多。
2:8 我嘛為家己積聚金銀，收集列王及逐省的財寶；閣得著唱歌的男女，真多宮妃，以及世間人所意愛的享受。
2:9 按呢我就比以前所有佇耶路撒冷的人閣較興旺；閣智慧嘛無離開我。
2:10 我的目睭所愛的，我無給伊阻擋；我的心所歡喜的，我無給伊禁止；因為我的心對我所拍拼的感覺滿足；這是我拍拼得著的報賞。
2:11 毋拘我看我的手所做的一切，以及我勞碌所達成的，攏是空虛，攏是掠風；日光的下面攏無利益。
2:12 我越轉來觀察智慧、癲狂，及愚戇。王的繼承人豈會當閣做什麼？不過做以前的王所做的若定。
2:13 我看出智慧比愚戇較好，親像光明比烏暗較好。
2:14 智慧的人看清楚頭前的路，愚戇的人佇烏暗中摸無路。毋拘我嘛知𪜶的結局攏像款。
2:15 我心內想，戇人抵著的，我嘛會抵著；按呢我有智慧有什麼利益？我心內講：這嘛是空虛。
2:16 智慧的人及愚戇的人平平攏𣍐永遠互人記念，因為到尾攏會互人𣍐記得。嗐！愚戇的人死，智慧的人嘛著死。
2:17 所以我怨慼性命，因為日光的下面所發生的代誌攏互我憂苦。這攏是空虛，攏是掠風。
2:18 我厭惡一切的勞碌，因為我佇日光的下面勞碌所達成的，攏著留互我的繼承人。
2:19 彼個人是智慧抑是愚戇啥人知；我佇日光的下面，用智慧拍拼所做的，攏會互伊掌管。這嘛是空虛。
2:20 按呢，對前到今佇日光下面的勞苦拍拼，我感覺真失望。
2:21 有人用智慧，用智識，用本事拍拼得著的，煞著留互毋曾為著許個財產拍拼的人做產業。這嘛是空虛，是大不幸。
2:22 人佇日光的下面拍拼操煩，有得著什麼？
2:23 伊一生的年日操煩，勞碌工作，連暝時心都無安寧。這嘛是空虛。
2:24 人上好是來食來飲，享受𪜶拍拼得著的成果。我看這嘛是上帝的安排。
2:25 若毋是對上帝，啥人會當飲食，享樂？
2:26 上帝將智慧、智識、快樂賜互伊所歡喜的人；毋拘有罪的人上帝互𪜶勞苦，將𪜶收拾積聚的，歸互伊所歡喜的人。這嘛是空虛，嘛是掠風。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。