上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
箴言
對少年人的勸告
3:1 我的子啊，毋通𣍐記得我的教示；
你的心著持守我的命令；
3:2 按呢，你會長歲壽好過日，
享受平安繁榮。
3:3 毋通互慈愛及真實離開你；
著縛佇你的頷頸，
刻牢佇你的心內。
3:4 按呢佇上帝及人的面前，
你會得著恩典及好名聲。
3:5 著專心倚靠上主；
毋通倚靠家己的聰明。
3:6 佇你一切的所做攏著尊重伊，
伊會指點你的路。
3:7 毋通看家己做有智慧；
著敬畏上主，離開歹事。
3:8 按呢，你的身體會勇健，
你的筋骨會勇壯。
3:9 著用你的財物
及一切頭水的土產獻互上主。
3:10 你的粟倉就會滿滿，
酒窟有新酒滿出來。
3:11 我的子啊，毋通看輕上主的管教，
嘛毋通厭惡伊的責備。
3:12 因為上主責備伊所疼的人，
親像老父責備伊所意愛的子。
3:13 得著智慧的人真有福氣，
伊有得著聰明。
3:14 得著智慧比得著銀較有利益，
比對金得著的利純較高。
3:15 智慧比紅寶石較貴氣；
人所意愛的無一項會當及伊比。
3:16 伊的正手有長歲壽；
伊的倒手有好額及尊貴。
3:17 伊的路有喜樂；
伊的道路互人平安繁榮。
3:18 持守智慧的人對伊得著性命；
堅守的人攏真有福氣。
3:19 上主用智慧建立地，
用聰明安置天。
3:20 伊用智識互深淵裂開，
互穹蒼滴露水。
3:21 我的子啊，著持守真的智慧，慎重計劃；
著不時注意，毋通忽略；
3:22 按呢才會互你得著性命，
成做你頷頸媠的妝飾。
3:23 你就會安穩行你的路；
你的腳𣍐觸著跋倒。
3:24 你倒啲，一定𣍐驚，
倒落去，會真好睏。
3:25 忽然發生通驚的代誌，你毋免驚；
歹人欲給你毀滅，你嘛毋免驚。
3:26 因為上主會做你的倚靠；
伊會保守你的腳無陷落羅網。
3:27 你若有氣力做好，毋通拒絕；
著幫贊需要幫贊的人。
3:28 你若做會到，毋通對你的厝邊講：
「你轉去，明仔載閣來，我才互你。」
3:29 厝邊及你和睦徛起，
你毋通設計害伊。
3:30 人毋曾陷害你，
你毋通無緣無故及伊冤家。
3:31 毋通欣羨強暴的人，
嘛毋通揀伊所行的路。
3:32 歪曲是非的人上主厭惡；
正直的人上主及伊親密。
3:33 上主咒詛歹人的家；
義人的厝受伊祝福。
3:34 藐視人的，上主藐視伊；
謙卑的人，上主施恩互伊。
3:35 智慧的人會得著尊榮；
愚戇的人所得著的是見笑。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。