上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
50:1 約瑟仆佇伊的老父雅各的面啼哭，給伊唚。
50:2 約瑟吩咐侍候伊的醫生，用香料抹伊的老父；醫生就抹雅各。
50:3 醫生照規定用香料抹雅各的身屍四十日久。埃及人為雅各哀哭七十日。
50:4 為著雅各哀哭的日期過了，約瑟對埃及王朝廷的官員講：「我若對恁得著恩典，請對埃及王轉達，
50:5 我的老父叫我咒誓，著佇伊死了後，將伊安葬佇迦南地，佇伊為著家己準備的墓。請替我請求王允准我上去埋葬我的老父，後來我會閣倒轉來。」
50:6 埃及王講：「你通照你咒誓的去安葬你的老父。」
50:7 約瑟就去埋葬伊的老父；及伊做夥去的有埃及王的人臣、埃及王朝廷的元老，及埃及國所有的長老，
50:8 閣有約瑟全家、伊的兄弟，以及伊的老父的家眷；只有𪜶的囝仔，及牛群羊群留佇歌珊地區。
50:9 另外有真多戰車及馬兵做夥去。送葬的場面非常盛大。
50:10 𪜶到約旦河東旁亞達的五穀場，就佇遐大啼哭，大哀傷；約瑟為著伊的老父哀傷追悼七日。
50:11 迦南地的住民看著亞達五穀場的哀哭，就講：「這是埃及人一場盛大的葬式。」彼個所在就叫做亞伯‧麥西，是佇約旦河的東旁。
50:12 雅各的子照𪜶的老父的吩咐，
50:13 將伊運到迦南地，安葬佇幔利的對面，麥比拉田野的洞穴，就是亞伯拉罕對赫人以弗崙買來做墓地的產業。
50:14 約瑟安葬伊的老父了後，就及伊的兄弟，以及所有及伊做夥去埋葬伊的老父的人，攏倒轉去埃及。
約瑟安慰伊的兄弟
50:15 雅各死了後，約瑟許個兄哥就講：「約瑟若猶怨恨咱，一定會照咱以前按怎歹款待伊給咱報復。」
50:16 𪜶就拜託人去給約瑟講：「你的老父啲欲死以前有交代講：
50:17 『恁著給約瑟按呢講：以前你的兄哥歹款待你，你著赦免𪜶的過失及罪惡。』今，阮是你的老父的上帝的僕人，求你赦免阮的罪惡。」𪜶對約瑟講諸個話，約瑟就哭出來。
50:18 伊的兄哥閣來仆佇伊的面前講：「阮是你的僕人。」
50:19 約瑟對𪜶講：「毋免驚；我哪會當代替上帝？
50:20 以前恁對我的意念是歹，毋拘上帝的意思是好，今仔日才會當有即多人活啲。
50:21 今恁毋免驚；我會照顧恁及恁的子兒。」約瑟用仁慈的話安慰𪜶，互𪜶安心。
約瑟死
50:22 約瑟及伊的老父的家眷攏住佇埃及。約瑟食百一歲。
50:23 約瑟有看著以法蓮第三代的孫，嘛認瑪拿西的孫瑪吉的子做繼承人。
50:24 約瑟對伊的兄弟講：「我閣食無偌久啦；毋拘上帝一定會照顧恁，導恁對遮上去到伊立誓應允欲互亞伯拉罕、以撒、雅各的地。」
50:25 約瑟叫以色列的子孫咒誓，約瑟講：「上帝一定會照顧恁，恁著將我的骨骸運倒轉去迦南地。」
50:26 約瑟死，抵仔百一歲；人用香料給伊抹，將伊囥佇棺木，停佇埃及。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。