上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
89:1 以斯拉人以探教示的詩。
為面臨災難的國家祈禱
我欲永遠唱歌稱讚上主的慈愛，
欲世世代代宣揚你的信實。
89:2 我曾講：「你的慈愛永遠堅立；
你的信實親像天𣍐動搖。」
89:3 你有講：「我及我揀選的人立約，
對我的僕人大闢宣誓：
89:4 『我欲建立你的後代到永遠，
堅固你的寶座到萬代。』」
89:5 上主啊，願天稱讚你奇妙的作為，
天使佇聚會中頌讚你的信實。
89:6 佇空中叨一個會比得上主？
眾神明中叨一個會親像上主？
89:7 伊佇天使的議會中是有大威嚴的上帝，
比一切佇伊四圍的神明閣較通驚畏。
89:8 上主 — 萬軍的統帥上帝啊，
你的大權能叨一個會當及你比？
你佇逐項代誌攏顯出信實。
89:9 海水漲高，你給伊管制；
海湧夯起來，你互伊平靜。
89:10 你一下手就拍碎海怪拉哈伯；
你用大氣力的手拍散對敵。
89:11 天屬你，地嘛你的；
世界及萬物攏是你所建立。
89:12 南及北是你所創造；
他泊山及黑門山攏歡喜稱讚你的名。
89:13 你的手骨有權能；
你的手有力，你的正手攑高高。
89:14 公義及正直是你寶座的地基；
慈愛及信實行佇你面前。
89:15 會曉對你歡呼的人真有福氣！
上主啊，𪜶欲隨你的面發出的光來行。
89:16 𪜶歸日因為你的名歡喜，
因為你的公義快樂。
89:17 你是𪜶奇妙的氣力；
因為你的恩典，阮會得著勝利。
89:18 上主是阮的保護者；
以色列神聖的上帝是阮的君王。
上帝對大闢的應允
89:19 你早曾佇異象中對你忠實的子民講：
「我有用花冠戴佇勇士的頭殼；
我對子民中揀選伊，高升伊。
89:20 我尋著我的僕人大闢，
用聖油抹伊。
89:21 我的手欲支持伊；
我的手骨欲賜伊氣力。
89:22 對敵無法度用計智贏過伊；
兇惡的人無法度窘迫伊。
89:23 我欲佇伊的面前拍碎伊的對敵，
拍敗許個怨恨伊的人。
89:24 我的信實及我的慈愛欲及伊同在，
因為我的名，伊會得著勝利。
89:25 我欲互伊的手伸到地中海，
伊的正手伸到幼發拉底河。
89:26 伊欲對我講：『你是我的父，我的上帝，
是拯救我的石磐。』
89:27 我欲設立伊做大子，
做世上上大的君王。
89:28 我欲對伊持守慈愛到永遠；
我及伊所立的約一定𣍐改變。
89:29 我欲保守伊的後代到永遠，
互伊的寶座親像天赫呢久長。
89:30 「伊的子孫若棄拺我的律法，
無遵守我的命令，
89:31 違背我的規例，
無遵行我的誡命，
89:32 我欲用柺仔刑罰𪜶的過失，
用鞭處罰𪜶的罪惡。
89:33 總是我一定𣍐對伊收回我攏總的慈愛，
嘛𣍐違背我的信實。
89:34 我一定𣍐違反我的約，
嘛𣍐改變我講的話。
89:35 「我指家己的聖潔堅決立誓，
絕對𣍐對大闢講白賊。
89:36 伊的後代會傳到永遠，
伊的寶座佇我的面前親像日頭赫呢久長；
89:37 親像月永遠穩固，
佇天頂作確實的見證。」
為君王戰敗哀傷
89:38 總是你有對你抹油選立的發受氣，
給伊拒絕棄拺。
89:39 你廢除及你的僕人所立的約，
將伊的花冠擲佇土腳踐踏。
89:40 你拆毀伊所有的城牆，
互伊的堡壘變做拋荒的所在。
89:41 過路人攏給伊搶奪；
隔壁國攏給伊凌辱。
89:42 你互伊對敵的正手攑高，
互𪜶攏歡喜。
89:43 你互伊的刀劍鈍去𣍐當用，
互伊佇交戰的時戰敗。
89:44 你將伊權柄的柺搶起來，
將伊的寶座捙倒佇地裡。
89:45 你減少伊少年的日子，
互伊大大見笑。
懇求上帝拯救
89:46 上主啊，你欲匿偌久，到永遠是無？
你親像火𤏸啲受氣欲偌久？
89:47 求你帶念我的性命赫呢短，
你創造的世間人赫呢空虛！
89:48 啥人會當久長活啲，無見著死，
會救家己的性命脫離陰府的權勢？
89:49 主啊，你以前的慈愛佇叨位？
你對大闢立誓應允的信實佇叨位？
89:50 主啊，求你會記得你的僕人所受的凌辱，
會記得我的心按怎承受列國的侮辱。
89:51 上主啊，你的對敵按呢啲侮辱你的僕人；
你抹油揀選的行到叨位，𪜶攏隨啲給伊凌辱。
89:52 願稱讚歸互上主到永遠！
阿們！阿們！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。