上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
78:1 亞薩教示的詩。
上帝引導背逆的子民
我的子民啊，著聽我的教示，
注意聽我講的話。
78:2 我欲開嘴講譬喻，
欲講出古早的奧祕，
78:3 就是阮所聽見，所知，
阮的祖先所傳互阮的事。
78:4 阮無欲將諸個事對子孫隱瞞，
欲將上主的名聲及伊的權能，
以及伊所做奇妙的事，傳互後世代。
78:5 伊佇雅各設誡命，佇以色列定律法，
閣命令咱的祖先將諸個傳互𪜶的子孫，
78:6 互後代，就是啲欲出世的子孫知；
諸個子孫嘛欲傳互𪜶的子子孫孫。
78:7 按呢，𪜶通將向望囥佇上帝，
互𪜶無𣍐記得上帝的作為，
遵守伊的誡命；
78:8 才免親像𪜶祖先的世代，硬心背逆；
𪜶對上帝心無堅定，心靈無真實。
78:9 以法蓮的子孫攑武器及弓箭，
爭戰的日，卻越轉身逃走。
78:10 𪜶無遵守上帝的約，
拒絕照伊的律法生活。
78:11 𪜶𣍐記得伊的作為，
𣍐記得伊互𪜶看見奇妙的事。
78:12 伊佇埃及地，瑣安的田野，
佇𪜶祖先的目睭前做奇異的事。
78:13 伊給海分開，互𪜶過去；
伊互水徛起來親像壁。
78:14 伊日時用雲導𪜶，
歸暝用火的光引導𪜶。
78:15 伊佇曠野互石磐爆裂，
互𪜶有真多水通飲，
親像對深淵淐出。
78:16 伊互水對石磐淐出，
親像江河流落來。
78:17 毋拘𪜶猶繼續得罪伊，
佇曠野背逆至高上帝。
78:18 𪜶心內試探上帝，
照家己意愛的求食物。
78:19 𪜶濫糝議論上帝，講：
「上帝豈會佇曠野辦桌？
78:20 伊曾摃石磐，互水淐出，
溪水滿出來；
伊豈會賜米糧？
伊豈會給伊的子民準備肉？」
78:21 所以，上主聽著就受氣，
用炎火燒雅各，
對以色列發受氣。
78:22 因為𪜶毋信服上帝，
毋倚靠伊的救恩。
78:23 毋拘伊猶命令頂面的穹蒼，
閣開天的門；
78:24 伊降落嗎哪互𪜶食，
將天的米糧賜互𪜶。
78:25 𪜶逐個人食天使的食物；
上帝賜米糧互𪜶食到飽。
78:26 伊對天起東風，
用伊的權能吹南風，
78:27 伊降落肉互𪜶，若土粉赫多，
降落飛鳥若海沙赫多，
78:28 落佇𪜶的營中，
佇𪜶徛起的所在的四圍。
78:29 𪜶就食，食到飽飽；
伊有照𪜶所愛的互𪜶。
78:30 𪜶所愛的猶未飽足，
食物猶佇嘴內的時，
78:31 上帝就對𪜶發受氣，
刣死𪜶中間勇壯的人，
拍倒以色列的少年人。
78:32 雖然按呢，𪜶繼續犯罪，
無因為上帝奇妙的作為來信伊。
78:33 所以伊互𪜶空空過日，
互𪜶年年佇驚惶中經過。
78:34 上帝刣𪜶的時，𪜶才來求伊；
越倒轉迫切尋求伊。
78:35 𪜶才會記得上帝是𪜶的保護者，
至高者上帝是𪜶的救贖主。
78:36 毋拘𪜶用嘴給伊扶挺，
用舌對伊講白賊。
78:37 𪜶對伊無忠信，
無真實守伊的約。
78:38 毋拘伊猶充滿憐憫，
赦免𪜶的罪過，無給𪜶毀滅，
一遍閣一遍忍啲，
受氣無攏發出來。
78:39 伊帶念𪜶不過是會死的人，
是吹過去𣍐閣倒轉來的風。
78:40 𪜶佇曠野不時背逆伊，
佇荒埔互伊憂悶。
78:41 𪜶一遍閣一遍試探上帝，
激以色列神聖的上帝受氣。
78:42 𪜶𣍐記得伊的權能，
𣍐記得伊解救𪜶脫離對敵的日。
78:43 伊佇埃及按怎行神跡，
佇瑣安的田野顯出奇事：
78:44 伊將𪜶的江河變做血，
致到水攏𣍐飲得。
78:45 伊互歸群胡蠅來𪜶遐吞食，
互田蛤仔來損害。
78:46 伊將𪜶的土產互草蜢公毀壞，
將𪜶勞苦得著的物互草蜢吞食。
78:47 伊落雹毀壞𪜶的葡萄樹，
落霜毀壞𪜶的桑材樹；
78:48 閣將𪜶的牲生交互冰雹，
將𪜶歸群的牲生交互熠爁。
78:49 伊發大受氣，
用受氣、痛恨、苦難
做歸陣的使者來給𪜶毀滅。
78:50 伊忍𣍐牢受氣，
無顧念𪜶的性命，
用瘟疫給𪜶毀滅。
78:51 伊刣死埃及所有的大子，
佇含的布棚拍死𪜶的頭上子。
78:52 伊親像啲導羊給家己的子民導出來，
導𪜶經過曠野。
78:53 伊導𪜶，互𪜶安穩無驚惶，
互海淹死𪜶的對敵。
78:54 伊閣導𪜶到聖地的境內，
到伊用氣力得著的山地。
78:55 伊佇𪜶的面前趕出列邦；
用索仔量土地互以色列的支族做產業，
互𪜶徛起佇家己的布棚。
78:56 𪜶猶原試探至高者上帝，背逆伊，
無守伊的誡命。
78:57 𪜶失信背逆，及𪜶的祖先像款，
親像冗去的弓𣍐靠得。
78:58 𪜶拜山頭壇，惹伊受氣，
拜雕刻的偶像，互伊痛恨。
78:59 上帝聽著真受氣，
就完全棄拺以色列。
78:60 伊棄拺示羅的會幕，
棄拺伊佇人的中間所搭的布棚。
78:61 伊允准人給約櫃搶去，
將伊的氣力及榮光交互對敵。
78:62 伊對伊的家業以色列發受氣，
將伊的子民交互對敵殺害。
78:63 𪜶的少年人受戰火燒滅；
𪜶的在室女𣍐當聽著結婚的祝歌。
78:64 𪜶的祭司倒佇刀下；
𪜶的寡婦哭𣍐出來。
78:65 彼時主親像人睏精神，
親像勇士酒後喊喝。
78:66 伊就給對敵拍退，
互𪜶永遠受凌辱。
78:67 伊棄拺約瑟的後代，
無揀選以法蓮支族。
78:68 伊揀選猶大支族，
伊所意愛的錫安山。
78:69 伊起造聖所親像天赫高，
親像伊建立的大地永遠堅固。
78:70 伊揀選伊的僕人大闢，
對羊椆導伊出來，
78:71 互伊無閣養飼羊群，
是欲互伊牧養主的子民雅各，伊的家業以色列。
78:72 大闢就用純正的心牧養𪜶，
用老練的手引導𪜶。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。