上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
68:1 大闢的詩歌，交互聖樂長。
勝利的歌
願上帝起來，互伊的對敵四散，
互怨恨伊的人對伊的面前逃走。
68:2 你給𪜶趕散，親像給煙吹散；
𪜶親像蠟見著火就熔去，
歹人見著上帝的面就消滅。
68:3 願義人佇上帝面前歡喜快樂；
願𪜶歡歡喜喜。
68:4 著對上帝吟詩，唱歌稱讚伊的名，
大大稱讚坐雲來的彼位；
伊的稱呼是上主。
著佇伊的面前快樂。
68:5 上帝佇伊聖的所在
做孤兒的父，寡婦的保護者。
68:6 上帝互孤單的人有厝通住，
導關監的人出來得著自由享福；
毋拘伊互背逆的人𫢶佇曠旱的地。
68:7 上帝啊，早你行佇你的子民頭前，
經過曠野；
68:8 地見著西奈的上帝，大振動；
天佇以色列的上帝面前落大雨。
68:9 上帝啊，你落大雨，
互焦燥的土地得著潤澤，
68:10 互你的族群佇遐徛起。
上帝啊，你互散赤人得著恩惠。
68:11 主出命令；
一大陣婦女傳好消息：
68:12 「君王及𪜶的軍隊攏逃走啦，逃走啦！」
留佇厝內的婦女嘛分著戰利品。
68:13 恁安穩倒佇羊椆內的時，
親像粉鳥的翼鑲白銀，毛鑲黃金。
68:14 全能者佇境內趕散列王的時，
勢面親像撒們山啲落雪。
68:15 巴珊山是極其高大的山；
巴珊山是有真多山嶺的山。
68:16 有真多山尖的山啊，
恁是按怎怨妒啲看上帝所愛徛起的山？
上主會𫢶佇遐到永遠。
68:17 上帝有戰車千千萬萬；
主對西奈出來，來到伊的聖所。
68:18 你已經上到高的所在，給俘虜掠來；
你對人接受貢品，甚至接受背叛的人的禮物，
互主上帝你佇𪜶中間徛起。
68:19 主應該受稱讚，伊日日背咱的擔；
伊就是救咱的上帝。
68:20 咱的上帝是拯救的上帝；
只有主上帝會救咱脫離死亡。
68:21 總是上帝欲拍破對敵的頭殼，
就是繼續犯罪的人的頭殼。
68:22 主講：「我欲給𪜶對巴珊導來，
對海上深的所在導倒轉來，
68:23 互恁對𪜶的血中行過，
互恁的狗舐𪜶的血。」
68:24 上帝啊，你是我的上帝，我的君王。
人已經看見你啲行，行入聖所。
68:25 唱歌的行佇頭前，奏樂的隨佇後面，
搖玲瓏鼓的查某囝仔行佇中間。
68:26 著佇大會中稱讚上帝，
就是上主，以色列的源頭。
68:27 上細的便雅憫做頭啲導，
猶大歸群的族長、
西布倫的族長、拿弗他利的族長隨佇後面。
68:28 上帝啊，求你顯出氣力；
求你顯示你給阮做的事。
68:29 為著你佇耶路撒冷的殿，
列王欲帶禮物獻互你。
68:30 求你責備埃及，伊親像佇蘆葦中的野獸；
求你責備列邦，𪜶親像歸群的牛及牛仔。
求你互貪愛貢品的人屈服佇你腳下；
求你趕散好戰的列邦。
68:31 特使欲帶貢品對埃及來；
古實欲趕緊對上帝獻禮物。
68:32 世上的列國啊，著對上帝唱歌，
吟詩稱讚主，
68:33 稱讚坐佇對古早就有、極高的天彼位。
伊發出極大有力的聲。
68:34 恁著將權能歸互上帝。
伊的威嚴佇以色列的頂面；
伊的權能顯示佇穹蒼。
68:35 上帝啊，你佇你的聖所實在通敬畏；
以色列的上帝賜氣力權能互伊的子民。
上帝應該受稱讚！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。