上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
22:1 大闢的詩，交互聖樂長；調，用「早起時的鹿母」。
困苦中的哀求及稱讚
我的上帝，我的上帝，你是按怎放拺我？
你是按怎離我遠遠毋救我，毋聽我的喉叫？
22:2 我的上帝啊，我日時求叫，你無應我；
我暝時求叫，無得著安寧。
22:3 你是聖的上帝，
你用以色列的稱讚做寶座。
22:4 阮的列祖倚靠你；
𪜶倚靠你，你有解救𪜶。
22:5 𪜶哀求你，有得著拯救；
𪜶倚靠你，你無互𪜶失望。
22:6 毋拘我毋是人，是蟲𧒴，
互人譏刺，受眾人看輕。
22:7 看著我的人攏給我恥笑，
撓嘴幌頭，講：
22:8 「你將本身交代上主，伊哪無來救你？
既然上主合意你，伊哪無來救你？」
22:9 你對母胎給我接出來；
你互我佇老母的胸前得著安穩。
22:10 我對出母胎就交託你，
對我出世，你就是我的上帝。
22:11 求你毋通離我遠遠，
因為患難逼近，無人幫贊我。
22:12 有真多牛包圍我；
巴珊的野牛四面圍困我。
22:13 𪜶親像獅開嘴大聲哮，
欲拆裂吞食我。
22:14 我的氣力親像水摒了了；
我的骨頭攏脫輪；
我的心親像蠟佇腹內消熔。
22:15 我的精力焦去，親像破去的瓦片；
我的舌黏佇頂顎𣍐講話；
你給我放佇土腳，出在我死。
22:16 歹人親像歸群狗包圍我，
親像獅拆裂我的腳、我的手。
22:17 我的骨頭攏會算得；
𪜶啲看我，啲相我。
22:18 𪜶分我的外袍，
為著我的衫抽籤。
22:19 上主啊，求你毋通離我遠遠；
上帝 — 我的氣力啊，求你緊來幫贊我。
22:20 求你救我脫離刀劍，
救我的性命脫離狗的勢力。
22:21 求你救我脫離獅的嘴；
你已經有聽我，互我脫離野牛的角。
22:22 我欲對我的兄弟報揚你的名；
我欲佇聚會中謳咾你。
22:23 恁敬畏上主的，著稱讚伊。
以色列的後代，著歸榮光互伊；
雅各的後代，攏著敬畏伊。
22:24 因為伊𣍐看輕散赤人，𣍐無視𪜶的困苦，
嘛𣍐面越走毋插𪜶；
𪜶求叫的時，上主有給𪜶聽。
22:25 我欲佇大聚會中稱讚你的所做；
我欲佇敬畏上主的人面前謝我的願。
22:26 散赤人會得著飽足；
尋求上主的人會稱讚伊。
願恁的心永遠有活氣！
22:27 地上所有的人攏會記得上主的所做來歸順伊；
世上萬族攏會佇伊面前敬拜。
22:28 因為主權屬佇上主，
伊是萬國的主宰。
22:29 地上所有富貴的人會聚集飲食，敬拜；
連啲欲死，啲欲歸土的人都會佇伊面前跪拜。
22:30 𪜶的子孫會服事伊；
主的作為會傳到𪜶的後代。
22:31 人會對將來欲出世的子民講：
「主已經完成伊的拯救。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。