上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
18:1 上主的僕人大闢的詩，交互聖樂長。上主救伊脫離所有的對敵及掃羅的手了後，伊向上主唸此首詩。
勝利的歌
( 撒下 22:1-51 )
上主 — 我的氣力啊，我敬愛你。
18:2 上主是我的山巖，我的要塞，我的拯救者；
是我的上帝，我的石磐，我欲倚靠伊；
伊是我的盾牌，救我的氣力，我的堡壘。
18:3 我求叫應該受稱讚的上主，
我就得著解救脫離對敵。
18:4 死亡的索纏我；
毀滅的大水互我驚。
18:5 陰府的索捆縛我；
死亡的羅網網著我。
18:6 我佇苦難中祈求上主，
對我的上帝求叫；
伊佇伊的殿內聽我的聲；
我佇伊面前的懇求有入伊的耳孔。
18:7 伊受氣，地就搖泏；
山的地基嘛振動搖閣泏。
18:8 對伊的鼻孔有煙淐出；
對伊的嘴有火發出，
連土炭嘛𤏸起來。
18:9 伊搋開天，親身降臨；
伊腳下有厚厚的烏雲。
18:10 伊騎天使基路伯啲飛；
伊坐風的翼衝落來。
18:11 伊用烏暗做伊隱密的所在，
用水及密雲圍起來做帳房。
18:12 冰雹及啲𤏸的炭對伊臨在的光射出來，
突破烏暗的密雲。
18:13 上主對天頂彈雷，
至高的上帝出聲；
閣有落雹及啲𤏸的炭。
18:14 伊射箭，互對敵四散；
伊發出熠爁，互𪜶混亂。
18:15 上主，你一下責備，
你鼻孔的氣一下出，
海底就露出，
大地的根基嘛露現。
18:16 伊對頂面伸手扭我，
對大水給我救出來。
18:17 伊救我脫離兇猛的對敵，
脫離怨恨我的人；
因為𪜶比我較強。
18:18 我抵著災難的時，𪜶來攻擊我；
毋拘上主是我的倚靠。
18:19 伊導我到開闊安全的所在；
伊救我，因為伊意愛我。
18:20 上主因為我正直報答我，
因為我的所做清氣報賞我。
18:21 我遵守上主的道路，
毋曾作歹離開我的上帝。
18:22 伊所有的命令我有遵守；
伊的規例我毋曾放拺。
18:23 我佇伊的面前無通指責；
我保守家己離開罪惡。
18:24 因為我正直，上主報賞我；
佇伊的目睭前，我的所做清氣。
18:25 慈愛的人，你用慈愛對待伊；
純全的人，你用純全對待伊；
18:26 清氣的人，你用清氣對待伊；
毋拘，奸詐的人，你用彎曲對待伊。
18:27 困苦的人，你解救伊；
自高的人，你給伊降低。
18:28 你點𤏸我的燈；
上主 — 我的上帝給我的烏暗變做光明。
18:29 我因為倚靠你，會當攻破敵軍；
倚靠我的上帝，會當跳過城牆。
18:30 此位上帝，伊的道路完全。
上主的話有過火鍛鍊；
倚靠伊的，伊做盾牌保護𪜶。
18:31 上主以外，豈有別個上帝？
阮的上帝以外，豈有石磐通倚靠？
18:32 此位上帝用氣力做帶縖我的腰；
伊引導我行安全的路。
18:33 伊互我的腳親像鹿𠢕走，
閣互我徛在佇高的所在。
18:34 伊訓練我的手𠢕交戰，
互我的手會開銅的弓。
18:35 你用盾牌解救我，
用正手扶持我。
你眷顧我，互我高升做大。
18:36 你互我踏的地開闊安全；
我的腳毋曾踏脫。
18:37 我追我的對敵到趇著𪜶；
𪜶無滅亡，我𣍐倒轉。
18:38 我拍𪜶悿悿，互𪜶𬦰𣍐起來，
到𪜶倒佇我的腳下。
18:39 你賜我氣力互我𠢕交戰；
你互攻擊我的人攏降服佇我下面。
18:40 你互我的對敵越轉身逃走，
閣互我剿滅怨恨我的人。
18:41 𪜶求叫，無人救𪜶；
求叫上主，伊嘛無應。
18:42 我給𪜶搥到碎碎，親像土粉互風吹散，
給𪜶摒出，親像街路的土糜。
18:43 你救我脫離反叛我的人民；
你設立我做列邦的頭。
我毋識的人民會服事我；
18:44 外邦的人屈身投降，
𪜶一下聽著我的名就順服。
18:45 外邦的人失膽，
驚惶愕愕惙行出𪜶的陣地。
18:46 上主永遠活啲！
願我倚靠的石磐受稱讚；
願救我的上帝受高舉。
18:47 伊就是為我申冤彼位上帝；
伊互眾人降服佇我腳下。
18:48 伊救我脫離我的對敵。
上主啊，你提拔我高過攻擊我的人；
你救我脫離強暴的人。
18:49 上主啊，因為按呢我欲佇列邦中感謝你，
唱歌稱讚你的名。
18:50 上主賜極大的救恩互伊設立的王，
施落慈愛互伊抹油選立的人，
互大闢及伊的後代，直到永遠。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。