上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
約瑟設計留便雅憫
44:1 約瑟交代管家講：「你著照𪜶帶會去的份量，將糧食給𪜶逐個人的布袋入互淀，閣將逐個人的銀落佇𪜶的布袋口。
44:2 將我銀的酒杯下佇彼個上少年的的布袋口；伊買五穀的銀嘛續下落去。」管家就照約瑟的吩咐去做。
44:3 天一下光，遐的人送約瑟的兄弟及𪜶的驢仔離開。
44:4 𪜶出城行無偌遠，約瑟給管家講：「趕緊去追趇許個人，趇著，就給𪜶講：『恁是按怎用歹報好？
44:5 恁哪偷提阮主人的銀杯？這是伊飲酒用的杯仔，嘛是卜卦啲用的。恁按呢做真毋著。』」
44:6 管家趇著𪜶，將諸個話給𪜶講。
44:7 𪜶應講：「先生，你哪會按呢講？你的僕人絕對𣍐做此款代誌。
44:8 阮以前佇布袋口看著的銀都對迦南地帶來還恁，阮哪會對恁主人的家偷提金銀？
44:9 你的僕人中間無論什麼人互你抄著，就互伊死，阮嘛欲做你的奴隸。」
44:10 管家講：「好，照恁的話做，佇什麼人遐抄著，彼個人就做我的奴隸；其他的人無罪。」
44:11 𪜶趕緊將布袋搬落來土腳，逐個人將𪜶的布袋解開。
44:12 管家就對大的開始抄，抄到細的；彼個銀杯竟然佇便雅憫的布袋內抄著。
44:13 看著按呢，𪜶就拆裂衫，將物件互驢載，倒去城內。
44:14 猶大及伊的兄弟到約瑟的厝，約瑟猶佇遐，𪜶就仆落土腳拜伊。
44:15 約瑟給𪜶講：「恁哪會做此款代誌？恁豈毋知，我此款人會曉卜卦？」
44:16 猶大講：「阮猶會當對我的主講什麼？阮無話通講，嘛無通辯解。上帝已經查出你的僕人的罪過，阮及彼個互你抄著銀杯的，攏欲做你的奴隸。」
44:17 約瑟講：「我絕對𣍐按呢做；佇什麼人遐抄著銀杯，彼個人就著做我的奴隸。恁其他的人攏通平安轉去恁老父遐。」
猶大替便雅憫求情
44:18 猶大行進前對約瑟講：「我的主，請允准你的僕人講一句話，毋通受氣；你及埃及王平有權柄。
44:19 我的主你曾問阮講：『恁有老父，有兄弟無？』
44:20 阮應講：『阮有老父，已經年老；閣有伊年老才生的煞尾子；伊的親生兄哥已經死，𪜶老母干焦放伊一個，閣𪜶老父上疼伊。』
44:21 你給你的僕人講：『導伊來我遮，互我親目看著伊。』
44:22 阮給我的主講：『囝仔𣍐當離開伊的老父；若離開，伊的老父會死。』
44:23 你給你的僕人講：『恁的煞尾小弟若無及恁做夥落來，恁就免想欲見我。』
44:24 「阮倒去你的僕人阮老父遐，就將你的話給伊講。
44:25 阮老父講：『恁閣去給咱買一寡米糧。』
44:26 阮就講：『阮𣍐當落去；你若互阮煞尾小弟做夥去，阮就落去；因為煞尾小弟若無及阮去，阮就𣍐當見彼個人。』
44:27 你的僕人阮的老父給阮講：『恁知我的某給我生兩個子；
44:28 一個離開我，伊一定互野獸拆碎啦！到今我猶毋曾閣看著伊。
44:29 今，恁閣將此個導去，離開我；若伊抵著災害，就是恁害我白頭毛悽慘落陰間。』
44:30 「阮老父的性命及此個囝仔的性命結相連。今阮倒去你的僕人阮老父遐，若此個囝仔無及阮做夥，阮老父看無伊，阮老父一定會死，
44:31 按呢就是阮互你的僕人阮老父白頭毛悽慘落陰間。
44:32 你的僕人有對我的老父保此個囝仔，講：『我若無導伊倒來交互你，我願一生擔此個罪。』
44:33 今求你允准你的僕人留啲，替此個囝仔做你的奴隸；互伊及伊的兄哥做夥轉去。
44:34 伊若無及我做夥轉去，我哪敢去見阮老父？我不忍心看著阮老父抵著此款災禍。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。