上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約伯記
撒旦試探約伯
1:1 烏斯地區曾有一個人叫做約伯，伊純全正直，敬畏上帝，無做歹代。
1:2 伊有七個子，三個查某子。
1:3 伊的財產有七千隻羊、三千隻駱駝、五百對牛、五百隻驢母；閣有真多僕人。伊是東方第一好額的。
1:4 伊許個子常常輪流佇𪜶家己的厝辦腥臊，嘛請𪜶三個姊妹做夥飲食。
1:5 每一遍𪜶輪流辦腥臊了，約伯會差人叫𪜶著潔淨家己。伊透早起來，照𪜶的人數替𪜶獻燒化祭。約伯照常按呢做，因為伊想講，伊的子可能有犯罪，褻瀆上帝。
1:6 有一日，上帝的眾使者來徛佇上主的面前，撒旦嘛做夥來。
1:7 上主問撒旦：「你去叨位？」
撒旦應上主：「我佇地上四界行來行去。」
1:8 上主對撒旦講：「你有注意著我的僕人約伯無？世間無人親像伊赫呢純全正直，敬畏上帝，無做歹代。」
1:9 撒旦應上主：「約伯敬畏上帝豈無理由？
1:10 你豈毋是有用籬笆給伊圍啲，保護伊、伊的家庭，及伊所有的一切？伊所做的，你賜福伊，互伊的牲生多甲𣍐算得。
1:11 伊所有的你親手給伊磕一下看覓咧，伊一定會當面給你咒詛。」
1:12 上主對撒旦講：「好，伊一切所有的攏佇你的手頭，毋拘毋通傷害著伊本身。」撒旦就對上主的面前出去。
約伯喪失兒女及財產
1:13 有一日約伯的子查某子抵仔佇𪜶大兄的厝啲食啲飲的時，
1:14 有一個使者來給約伯講：「牛啲犁田，驢母佇邊仔食草的時，
1:15 示巴人忽然來攻擊，給牛及驢攏搶去，閣用刀刣死許個僕人；只有我一個走有離來報你。」
1:16 伊講猶未煞，閣有一個來，講：「上帝的火對天降落，燒死羊群及許個僕人；只有我一個走有離來報你。」
1:17 伊講猶未煞，閣有一個來，講：「迦勒底人分做三隊忽然來攻擊，給駱駝攏搶去，閣用刀刣死許個僕人；只有我一個走有離來報你。」
1:18 伊講猶未煞，閣有一個來，講：「你的子查某子，佇𪜶大兄的厝啲食啲飲的時，
1:19 忽然有大風對曠野透來，掃厝的四角頭，厝倒，硩死許個少年人；只有我一個走有離來報你。」
1:20 約伯就徛起來，拆裂外衫，剃頭，仆佇土腳拜，
1:21 講：
「我褪裼出母胎，
嘛會褪裼倒去；
上主賞賜，
上主提去。
願上主的名受稱讚！」
1:22 雖然抵著諸個代誌，約伯並無犯罪指責上帝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。