上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯帖記
猶太人消滅對敵
9:1 十二月，就是亞達月十三日，王的命令及詔書啲欲執行，此個日原來是猶太人的對敵向望欲壓制𪜶的日，毋拘猶太人顛倒制伏所有怨恨𪜶的人。
9:2 彼日，佇亞哈隨魯王的逐省，猶太人佇𪜶的城聚集，攻擊許個欲害𪜶的人；無人會當抵抗，因為人民攏驚𪜶。
9:3 逐省的領袖 — 總督、省長，及行政官員 — 攏來幫贊猶太人，因為𪜶驚末底改。
9:4 末底改佇朝廷真受尊重，名聲傳到逐省；伊的權力愈來愈大。
9:5 猶太人照家己的意思對待怨恨𪜶的人；用刀刣死𪜶，給𪜶剿滅。
9:6 佇書珊城，猶太人刣死五百人；
9:7 閣刣死巴珊大他、達分、亞斯帕他、
9:8 破拉他、亞大利雅、亞利大他、
9:9 帕瑪斯他、亞利賽、亞利代，及瓦耶撒他；
9:10 此十個人攏是哈米大他的孫，猶太人的對敵哈曼的子；毋拘猶太人無搶𪜶的財產。
9:11 彼日，人將書珊城受刣的人數對王呈報。
9:12 王對王后以斯帖講：「猶太人佇書珊城刣死對敵五百人，閣刣死哈曼十個子；佇其他逐省毋知做了按怎。今你愛什麼，我會互你；你求什麼，我嘛欲互你。」
9:13 以斯帖就講：「王若看做好，求你允准書珊的猶太人，明仔載嘛照今仔日的詔書來做，閣將哈曼十個子的屍體吊佇柴架頂。」
9:14 王就命令照按呢執行；彼個詔書佇書珊頒布，人就將哈曼十個子吊起來。
9:15 亞達月十四日，書珊的猶太人閣聚集，起來刣死城內三百人；毋拘無搶𪜶的財產。
9:16 佇王逐省其他的猶太人嘛攏聚集，起來保護家己的性命，脫離對敵，得著平安。𪜶攏總刣死七萬五千個怨恨𪜶的人，毋拘無搶𪜶的財產。
9:17 亞達月十三日做此個事；十四日歇睏，佇此日辦桌，歡喜慶祝。
9:18 毋拘，書珊的猶太人佇十三十四此兩日聚集，保護家己；十五日歇睏，佇此日辦桌，歡喜慶祝。
9:19 因為按呢，住佇無城牆的庄社的猶太人，用亞達月十四日做節日辦桌，歡喜慶祝，閣互相送禮物。
普珥日
9:20 末底改記錄諸個事，閣寫批互亞哈隨魯王逐省遠近所有的猶太人，
9:21 吩咐𪜶逐年著守亞達月十四十五兩日做節日。
9:22 此兩日是猶太人脫離對敵，得著平安的日；彼月是憂悶變做歡喜，悲哀變做快樂的月；𪜶著佇此兩日辦桌慶祝，互相送禮物，閣賑濟散赤人。
9:23 猶太人答應欲遵守末底改的指示，照開始的時所做的，逐年守此個節日。
9:24 猶太人的對敵，亞甲族哈米大他的子哈曼，設計謀欲消滅猶太人，抽普珥，就是抽籤，為著欲殺害，剿滅𪜶；
9:25 毋拘以斯帖將此個代誌對王報告，王就頒布詔書，互哈曼計謀欲害猶太人的歹代，報應佇伊家己的身上，閣伊及伊許個子互人吊佇柴架頂。
9:26 對按呢，猶太人照普珥的名叫許個日做普珥日。𪜶因為末底改此張批以及𪜶親身的經歷，
9:27 就為著𪜶、𪜶的後代，以及所有歸化改宗的人，決定欲永遠佇逐年照規定，守此兩日做節期；
9:28 閣欲世世代代、家家戶戶、逐省逐城，守普珥日，佇猶太人的中間永久記念。
9:29 亞比孩的查某子王后以斯帖及猶太人末底改，全權寫第二張批確定普珥日。
9:30 𪜶用和平、誠實的話，寫此張批互亞哈隨魯王國內一百二十七省的猶太人，
9:31 照猶太人末底改及王后以斯帖的指示，設立普珥日；親像猶太人為家己及𪜶的後代規定禁食哀哭的日像款。
9:32 以斯帖命令著守普珥日的事，嘛有記錄佇冊卷裡。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。