上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯帖記
猶太人的反擊
8:1 彼日，亞哈隨魯王將猶太人的對敵哈曼的家產賜互王后以斯帖。末底改嘛來佇王的面前，因為以斯帖已經對王講：末底改是伊的親人。
8:2 王給對哈曼提轉來的手指，對家己的手剝起來互末底改；以斯帖閣委任末底改管理哈曼的家產。
8:3 後來，以斯帖閣去見王，仆佇伊的腳前，流目屎求王阻止亞甲族的哈曼謀害猶太人的計劃。
8:4 王向以斯帖伸出伊的金柺，以斯帖就徛起來，
8:5 對王講：「王若看做好，我若得著王的恩惠，王若看此個事做妥當，我若得著王的歡喜，懇求王下詔書，撤銷前亞甲族哈米大他的子哈曼計謀欲消滅王逐省的猶太人的詔書。
8:6 我哪會忍心看家己的同胞受陷害？哪會忍心看家己的宗族受消滅？」
8:7 亞哈隨魯王就對王后以斯帖及猶太人末底改講：「因為哈曼謀害猶太人，我已經將伊的家產賜互以斯帖，人嘛將哈曼吊佇柴架頂。
8:8 恁通用王的名照恁看做妥當的，寫詔書互猶太人，用王的手指蓋印。所有用王的名寫，閣用王的手指蓋印的詔書，無人會當取消。」
8:9 三月，就是西彎月二十三日，王的書記照末底改的指示，寫詔書寄互猶太人，嘛送互對印度到古實，共一百二十七省的總督、省長，及人臣，用逐省的文字及逐族的語言來寫；寄互猶太人的嘛照𪜶的文字及語言寫。
8:10 末底改用亞哈隨魯王的名義寫詔書，用王的手指蓋印，將彼個詔書交互送文書的，騎皇家快馬送到逐所在。
8:11 佇詔書的內面，王允准逐個城的猶太人聚集，起來保護𪜶家己的性命；逐省逐族若有軍兵欲攻擊𪜶，𪜶通反擊，殺害，消滅許個人，嘛通刣死𪜶的囝仔及婦仁人，閣搶𪜶的財產；
8:12 佇亞哈隨魯王的逐省，猶太人佇十二月，就是亞達月十三日彼日會當按呢做。
8:13 詔書的抄本成做法令，對逐省、逐族頒布，通互猶太人準備，聽候彼日，對𪜶的對敵報仇。
8:14 許個送文書的奉王的命令趕緊騎皇家快馬出去；此個詔書嘛佇書珊城頒布。
8:15 末底改穿藍色白色的朝服，戴大頂的金冠冕，穿紫色幼麻布的外袍，對王的面前出來。書珊城充滿歡喜快樂的聲。
8:16 對猶太人來講，這是光明、歡喜、快樂、尊貴的事。
8:17 王的詔書及命令送到的逐省逐城，猶太人攏歡喜快樂，辦桌慶祝，定彼日做節日。逐所在有真多人因為驚猶太人，就改宗做猶太人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。