上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯帖記
以斯帖辦桌請王及哈曼
5:1 第三日，以斯帖穿王后的禮服，徛佇王宮的內埕，面向王宮；彼時王佇王宮內坐佇伊的王位，面向王宮的門。
5:2 王看著王后以斯帖徛佇埕裡，就對以斯帖施恩，將手中的金柺向伊伸出，伊就進前，摸金柺的頭。
5:3 王對伊講：「王后以斯帖，你有什麼代誌，欲求什麼？就是王國的一半，我嘛會互你。」
5:4 以斯帖講：「王若看做好，請王及哈曼今仔日來赴我為著王設的宴席。」
5:5 王聽以斯帖的話，召哈曼趕緊來。王及哈曼就去赴以斯帖的宴席。
5:6 佇酒宴的中間，王閣對以斯帖講：「你愛什麼，我會互你；你欲求什麼，就是王國的一半，我嘛欲互你。」
5:7 以斯帖應講：「我的請求是按呢：
5:8 我若得著王的恩惠，王歡喜允准我的請求，就請王及哈曼明仔日閣來赴我為著恁準備的宴席；彼時我才回答王我所欲求的。」
哈曼計謀欲害死末底改
5:9 彼日，哈曼歡喜爽快，離開宴會；毋拘看著末底改佇王宮的門口無徛起來，無對伊表示一屑仔敬意，就對末底改非常受氣。
5:10 哈曼家己勉強忍啲，倒去伊的厝。伊派人叫伊的朋友及伊的某細利斯來，
5:11 對𪜶展家己的榮華富貴及真多子兒，以及王的提拔，互伊比所有的人臣及領袖較高。
5:12 哈曼閣講：「王后以斯帖干焦請王及我去赴伊的宴席；明仔載我欲閣及王做夥去互伊請。
5:13 毋拘我逐遍看著猶太人末底改坐佇王宮的門口，諸個一切就對我攏無意義。」
5:14 伊的某細利斯及伊的朋友給伊講：「著做一個二十二公尺高的柴架。明仔早起，你求王將末底改吊佇彼頂面，然後就通歡歡喜喜及王做夥去赴宴席。」
哈曼看此個意見真好，就叫人做柴架。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。